Амалий машғулот№1

Мотивация

Тиббиёт касбига кириш фани клиник фанлар блокига кириб талабани фанга нисбатан қизиқишини орттириш, тиббиёт фанининг бошланғич кўникмаларини ҳосил қилиш. Даволаш профилактика муассасалари фаолияти билан таништирилади, иш фаолияти ўргатилади.

2. 
   Фанлараро ва фан ичидаги боғлиқлик
   

Даволаш профилактика муассасалари фаолиятини ўрганишда биология, одам анатомияси, этика ва деонтология каби фанлар билан боғлиқ холда ўрганилади.

3. 
   Машғулот мазмуни:
   

3.1. Назарий қисм
Педиатрия юнонча “педос” - бола, “uатрия” – даволаш сўзларидан келиб чиққан бўлиб, болаларнинг ривожланиш қонуниятларини, касалликларнинг сабаблари ва механизми, даволаш ва олдини олишни ўрганади. Катта одамлардаги кўп касалликларнинг келиб чиқиши гўдаклик ёшига бориб тақалади. Шунинг учун, болалик даври, ривожланиш шароити ва бола тарбияси қандай ўтган бўлса, катта одамнинг соғлиги ҳолати худди шундай бўлади.
Педиатрия боланинг ўсиш ва ривожланиш даврларини, бола ҳаётининг ҳар бир ёш босқичларига хос алоҳида морфологик, физиологик ва психологик ўзгаришларни ўргатади. Шу сабабли боланинг клиник анатомияси тўғрисидаги билимлар ўз вақтида текшириш усулларини ўтказиш ва олинган натижаларни баҳолашга асос бўлади. Бундан ташқари, асосий анатомо-физиологик хусусиятларни ҳисобга олиш, боланинг кун тартиби ва ҳаёт муҳитини аниқ ташкиллаштиришга асос бўлади. Педиатр бола ва унинг ота – онаси билан доимий мулоқотда бўлади. Болалар шифокори яхши психолог ва педагог бўлиши керак. Бу унга ота – она ва бемор олдида ўз обрўсини кўтаришга ёрдам беради, натижада болани тезроқ тузалишига олиб келади.


Соғлиқни сақлаш: асосий тушунчалар, тамойиллар. Соғлиқни сақлаш муассасаларининг номенклатураси. БОЛАЛАР Даволаш профилактика муассасаларининг турлари ВА ВАЗИФАЛАРИ.


Ўзбекистонда аҳоли саломатлигини сақлаш ва янада мустаҳкамлаш давлатнинг муҳим тиббий – ижтимоий вазифаларидан бири ҳисобланади. Ушбу масала Ўзбекистон Республикасининг конституцияси ва давлатнинг бошқа қонунчилик ҳужжатларида ўз аксини топган. Аҳоли саломатлигини сақлашнинг барча қирралари 1996 йил 29 августда қабул қилинган Ўзбекистон Республикасининг “Фуқаролар соғлиғини сақлаш тўғрисида”ги қонунида тўлиғича ўз аксини топган.
Аҳоли саломатлигини муҳофаза қилишнинг турли қирраларини ёритишдан аввал “саломатликни муҳофазалаш” тушунчасига тўхталиб ўтиш лозим, чунки ўтган асрнинг 50-йилларигача турли мамлакатларда ушбу тушунчага турлича таъриф берилган. 1952 йил Жаҳон соғлиқни сақлаш ташкилотининг жамоат соғлиғини сақлашни ташкиллаштириш экспертлари томонидан аҳоли саломатлигини муҳофазалаш тушунчасига қуйидагича таъриф берилган.
“Саломатликни муҳофазаш” – бу касалликларни олдини олиш, умрни узайтириш, ақлий ва жисмоний саломатликни таъминлаш ва одамлар фаолиятининг самарадорлигини ошириш мақсадида, жамиятнинг ташкилий аолиятларини кучайтириш орқали атроф-муҳитни соғломлаштириш, юқумли касалликларга қарши кураш, одамларни шахсий гигиена қоидаларига ўқитиш, эрта ташхислаш ва касалликлар профилактикасини амалга ошириш учун тиббиёт ва врачлик ёрдамини ташкил этиш, ҳамда ҳар бир инсоннинг турмуш даражасини, саломатлигини яхшилаш, қўллаб қувватлаш мақсадида ижтимоий механизмларни тараққий эттириш ҳақидаги санъат ва фандир. Бундай фаровонликлар таъминланганда ҳар бир фуқаро узоқ умр кўришга, соғлом ҳаёт кечиришга бўлган ўзининг ажралмас ҳуқуқини амалга ошириш имконига эга бўлади.
Россия соғлиқни сақлаш вазирлиги ноинфекцион касалликлар профилактикаси ва хавфли омилларни координациялаш маркази томонидан “Саломатликни муҳофазалаш” тушунчасига қуйидагича таъриф берилади: Саломатликни муҳофазалаш (инглиз тилидан, жамоат соғлиғини сақлаш” – health protection тушунчасига яқин) – бу бутун жамоа, оила, алоҳида шахс саломатлигини сақлаш ва мустаҳкамлашга, фаол узоқ умрни қўллаб қувватлашга, тиббий даволаш профилактик ёрдамни кўрсатишга қаратилган сиёсий, иқтисодий, ҳуқуқий, ижтимоий, маданий, тиббий, санитария-эпидемиологик тадбирлар мажмуидир.
Бугунги кунда аҳоли саломатлигини муҳофазалаш фақат соғлиқни сақлаш ташкилотларининггина вазифаси эмаслиги ҳаммамизга маълум. Бу умуман давлат, жамият иши, аммо бу жараённи бошқаришда соғлиқни сақлаш тизими, муҳим бирлаштирувчи, координациялаштирувчи ролни ўйнайди. Жамоат соғлиғини сақлаш, аниқ аҳоли гуруҳининг эҳтиёжларидан келиб чиқиб кенг қамровли соғлиқни сақлаш хизматини ташкил этишдан иборат. Шунинг учун ҳам аҳоли саломатлиги ҳолатидан келиб чиққан ҳолда, тегишли ресурсларни аниқлаш бўйича маълумотларга эга бўлиш талаб этилади. Демак, Жамоат соғлиғини сақлашнинг моҳияти аҳоли саломатлигини мустаҳкамлаш, касалликларнинг олдини олиш, ташхислаш ва даволаш, ҳамда жисмоний, ижтимоий ва касбий жонлаштириш мақсадида кадрларни, тиббий хизмат кўрсатиш учун зарур бўлган турли тиббиёт аппаратлари, асбобларини аниқлашдан иборат.
Ўзбекистонда аҳоли саломатлигини муҳофазалаш йиллар давомида шаклланган кучли соғлиқни сақлаш тизими орқали амалга оширилади.
Соғлиқни сақлаш тизими деганда – тиббий ёрдамни ташкил этиш, касалликларнинг олдини олиш, аҳоли саломатлик даражасини яхшилашга қаратилаган ва ижтимоий – иқтисодий характерга эга бўлган давлат ва жамият чора – тадбирлари йиғиндиси тушинилади.