«Электр аппаратлари ва Автоматлаштириш»

6-боб
Бошқариш аппаратлари
6.1. Умумий маълумот

Бошқариш аппаратларига қўлда ва автомат бошқариладиган турли хил ўзгарувчан ва ўзгармас токда ишлайдиган электр аппаратлари киради.

Бу аппаратлар берилган жараёнларни бошқариш, тезликни бошқариш, ишчи машиналарнинг элементларини силжишини ва бошқаларни таъминлаб беради.
Қаршиликлар, контроллёрлар ва реостатлар электр машиналарида ва электр занжирларидаги ток ва кучланишнинг қийматини ўзгартириш ёки бир хилда (ўзгармас) ҳолда ушлабтуришга мўлжалланган. Электромагнитлар ва электромагнит қурилмалар тормозловчи тизимлар, пневмо ва гидромагистралларнинг ниятини беради. Электромагнит муфталар эса ишчи машиналар билан бирга айланаётган электр моторларининг валларини улаш, реверслаш ва тормозлаш учун хизмат қилади. Буйруқ берувчи аппаратлар ва электромеханик қайта улагичлар аппарат ва қурилмаларнинг занжиридаги турли хил қайта улашларни амалга оширади. Контактор ва магнит ишга туширгичлар масофадан ва автомат равишда электр машиналари ва аппаратларини бошқариш, нормал режимда куч электр занжирларини улаш ва узишни амалга оширади. Комплект қурилмалар эса бир вақтнинг ўзида бир нечта аппаратларнинг вазифасини бажаради.
Бошқариш аппаратларини бажарадиган функциясига қараб икки турга бўлинади:

1. 
   қўлда бошқариладиган
   
2. 
   масофадан туриб бошқариладиган.
   

Биринчи гурухга контроллерлар, қаршиликлар, реостатлар ва командоаппаратлар киради.
Иккинчи гурухга электромагнитлар, контакторлар, магнит ишга туширгич ва бошқалар киради.
Бошқариш аппаратлари ишончли ва аниқ ишлаши лозим. Электр аппаратлари ишлаганда қизийди. Ана шу қизиш йўл қўйилган қизиш чегарасидан ошиб кетмаслиги шарт.
Электр занжирларида қисқа туташув бўлганда электр аппаратларида номинал токка нисбатан жуда катта токлар оқади.
Шу сабабли бу ҳолда автомат узгич электр аппаратини электр занжирдан узиши лозим.
Очиқ тоғ-кон ишларида умумий мақсадли электр аппаратлари кенг кўламда қўлланилади. Ер ости тоғ-кон ишларида эса электр аппаратлари махсус портлашга қарши қобиқ ёки махсус изоляция материали билан муҳофазаланган бўлади.