Allayarov A. I. O’rmonov H. B. O‘zbekistondagi ziyoratgoh obidalar

O‘zbekiston Respublikasi Fanlar akademiyasining Abu Rayxon Beruniy nomidagi Sharqshunoslik institutining qo‘lyozmalar fondida saqlanayotgan “Xazinat ul-asfiyo” kitobida keltirilishicha musulmon olamida ikki zot Zaynulobiddin degan laqab olgan. Bu laqabni birinchi bo‘lib hazrati Ali ibn Husayn ibn Ali Murtazo olganlar. U zotning kunyalari – Abulhasan, laqablari Zaynulobiddin bo‘lib 36 yoki 38 hijriy yilda Madinada tug‘ilganlar, onalari bibi Shahribonu Eron podshosi Yazdijardning qizi bo‘lganlar. Nomi zikr etilgan kitobda keltirilishicha, imom Ali ibn Husayn kechasi nomozi tahajjud o‘qiyotganlarida shaytoni la’in ajdaho suratiga kirib, u kishini namozdan to‘xtatish uchun kirib keladi. U zot unga e’tibor ham qilmaydilar, oqibatda ajdaho oyoqlariga nish uradi. Ammo hazrat oyoqlari qattiq og‘rig‘iga va shishganiga qaramay, namozni tark qilmaydilar. Olloh taolo u zotga uning shayton ekanligini ma’lum qiladi. Shunda u zot “la havla”ni o‘qib, uni tarsaki bilan uradilar, u tutunga aylanib g‘oyib bo‘ladi. Shu onda g‘aybdan “yo Zaynulobiddin” degan ovoz keladi, shundan so‘ng u kishiga Zaynulobiddin laqab bo‘lib qoladi (“Xazinat ul-asfiyo”, 31-bet).