Adabiyot Abituriyentlar uchun 3-qism mustaqillik davri o‘zbek adabiyoti

Abdulla Oripov, O‘zbekiston Qahramoni
«Erkin Vohidov dilbar rubobiy taronalari, asr armoni, fig‘oni darajasiga ko‘tarilgan dostonlari qatori g‘oyat nozik lutf, beozor qochirimlar, ayni paytda istehzo, kinoya-kesatiqlar, o‘tkir ijtimoiy pafos bilan yo‘g‘rilgan hajviyoti, benazir tabassumi bilan ham elimiz uchun ardoqlidir».
Umarali Normatov, adabiyotshunos
«Erkin Vohidov badiiy adabiyot daholari ruhini shod etgan, yangi o‘zbek adabiyoti darg‘alari duosini olgan, o‘z xalqi qalbiga chuqur kirib borgan san’atkordir. Bunday shoir hech qachon zavol ko‘rmaydi».
Abdug‘afur Rasulov, adabiyotshunos

O‘zbekiston xalq shoiri Erkin Vohidov 1936-yil 28-dekabrda Farg‘ona viloyatining Oltiariq tumanida muallim oilasida tug‘ilgan. Uning otasi ikkinchi jahon urushidan og‘ir jarohat olib qaytadi va 1945-yilda vafot etadi. Oradan bir yil o‘tgach, onasi ham dunyodan o‘tadi. 10 yoshga yetar-yetmas ham ota, ham onadan ajrab qolgan yosh Erkinni tog‘asi o‘z tarbiyasiga oladi. Toshkentga – tog‘asinikiga kelgan shoir qunt bilan o‘qishlarini davom ettiradi. Kitobga, adabiyotga muhabbat yosh Erkinda ancha erta namoyon bo‘la boshladi. U shoir G‘ayratiy tomonidan o‘quvchilar saroyida tashkil etilgan adabiy to‘garakda ijod sirlarini o‘rganishga kirishdi.

E. Vohidov Toshkent davlat universiteti (hozirgi mirzo Ulug‘bek nomidagi O‘zbekiston milliy universiteti) ning filologiya fakultetiga o‘qishga kiradi. Universitetni tugatgach Erkin Vohidov «Yosh gvardiya» nashriyotida, G‘afur G‘ulom nomidagi adabiyot va san’at nashriyotida muharrir, bosh muharrir, direktor, «Yoshlik» jurnalida bosh muharrir lavozimlarida faoliyat yuritdi.
Ilk to‘plami: «Tong nafasi» (1961)
Ilk dostoni: «Nido» (1964)
She’rlari: «Tong lavhasi», «Buloq», «Sevgi», «Ona tuproq», «Kamtarlik haqida»
Asarlari: «Qo‘shiqlarim sizga», «Yurak va aql», «Mening yulduzim», «Lirika», «Yoshlik devoni», «Charog‘bon», «Dostonlar», «Muhabbat», «Hozirgi yoshlar», «Tirik sayyoralar», «Iztirob»