Abu Ali ibn Sino nomidagi Buxoro tibbiyot instituti Ichki kasalliklar propedevtikasi kafеdrasi

4. Qiyosiy tashxisi. 
Quruq plevrit krupozli zotiljam, spontanli pnevmotoraks, qovurg‘alar aro 
nevralgiya, neyromiozitlar, perikardit, qorin bo‘shlig‘ining o‘tkir kasalliklari (o‘tkir xoletsistit, 
appenditsit) bilan farqlanadi. Quruq plevrit chap tomonda bo‘lganda uni stenokardiya va miokard 
infarktidan ajratish kerak. Tashxis Kasallikning klinik manzarasiga, EKG va laboratoriya 
belgilariga qarab qo‘yiladi. Quruq plevrit diafragmaning usti sohasiga joylashganida diafragma osti 
abstsessi yoki appenditsitdan farqlash kerak. Taqqoslaganda og‘riqning nafas olish bilan bog‘liqligi, 
tana haroratining va qon sinamasining deyarli o‘zgarmaganligi, plevraning ishqalanish shovqinining 
eshitilishi quruq plevritni tasdiqlaydi. Ko‘ks oralig‘i plevrasining yallig‘lanishida plevra ishqalanish 
shovqinidan farqlash kerak. Perikard shovqini yurakning maromli qisqarishi bilan bog‘liq bo‘lsa, 
plevraning ishqalanish shovqini esa nafas olish bilan bog‘liqdir.
Qovurg‘alararo nevralgiyadan va miozitdan farqi quruq plevritda sog‘ tomonga engashganda, 
yallig‘langan plevraning cho‘zilishi hisobiga og‘riq kuchayadi. Qovurg‘alar orasini paypaslaganda 
miozitda va nevralgiyada og‘riq kuchli, quruq plevritda esa o‘rtacha. 
5. Oqibati. 
Asosiy kasallikning davolash samaradorligiga bog‘liq, yakuni asosan ijobiy. 
6. Davosi.
Quruq plevrit ikkilamchi jarayon bo‘lganligidan muolajalar asosiy xastalik (o‘pka sili, 
o‘tkir zotiljam, o‘pka abstsessi, revmatizm va boshqalar)ni tugatishga qaratilgan bo‘lishi kerak. 
Davolash vositalari og‘riqni va yo‘talni yo‘qotishga yo‘naltiriladi. Buning uchun analgin yoki 
amidopirin kuniga 2g, butadion 0,45g, aspirin 2-3g, pirazolon qatoridagi preparatlar (indometatsin 
0,025g 3-4 marta), glauvent (0,05g 2-3 marta), tusupreks (0,01-0,02g 3-4 marta).