Abbatisa – ayollar katolik monastirlarining boshqaruvchilari. Abbatlik

Boyarlar Dumasi – X asrda vujudga kelgan Rus knyazi huzuridagi oliy kengash. Maslahat va qonunchilik funksiyasini bajargan.
Bogʻichlar ordeni – 1348-yilda Angliyada qirol Eduard III tomonidan ta’sis etilgan orden. Dastlab bu ordenga qirol va 25 nafar ritsar kirgan. Orden a’zolarining alohida belgisi bu oyoqlarida moviy bogʻich bogʻlab olishlaridir.
Breteni sulhi – Fransiyaning Shartr shahri yaqinidagi qishloq boʻlib, u yerda 1360-yil 8-mayda Angliya va Fransiya oʻrtasidagi “Yuz yillik urush” davrida tinchlik shartnomasi imzolangan. Tinchlik shartnomasiga koʻra Frantsiya qiroli Ioann II ni asirlikdan ozod qilish uchun 3 mln ekyu toʻlov toʻlashi, Angliyaning Giyen hamda Armanyak, Perigor, Puate, Sentonj va janubi-gʻarbda bir qator grafliklar, Pont’ye grafligi, Kale qal’asi va unga tutash shimoli-gʻarbda hududlar ustidan hokimiyatini tan olishi majburiyatini oldi. Oʻz navbatida, Edvard III fransuz taxtiga boʻlgan da’vosidan voz kechganligini e’lon qildi.
Breve (lot. breves–qisqa) – Rim papalarining cherkov va boshqa diniy masalalar yuzasidan yuborgan vakili. Asosan ular ikkinchi darajali deb hisoblangan masalalar boʻyicha yuborilgan.
Breviariy (lot. breviarium – qisqacha izoh) – katolik cherkovida xizmatchi ruhoniylar. Ular Bibliyadagi psalmlar, duolar va madhiyalarni qisqacha izohlari bilan oddiy aholiga tushuntirishlari lozim boʻlgan.
Brigandina – charm yoki qalin matodan tikilgan kiyim. Gʻarbiy Yevropa mamlakatlarida XVI asrga qadar otliq va piyoda askarlar tomonidan keng miqyosda kiyilgan.
Brigandlar – yuz yillik urushlar davrida Angliya va Fransiya armiyalaridagi yollanma askarlar. Tinchlik sulhlari imzolangandan keyin har ikkala mamlakatda ular harbiy xizmatdan ozod qilingan. Ammo xizmatdan ozod qilingandan keyin ular talonchilik bilan shugʻullana boshlagan, bundan asosan, dehqonlar jabr koʻrishgan.
Bryugge tonggi ibodati (saharligi) – Bryugge shahri hunarmandlarining fransuzlar hukmronligiga qarshi 1302-yil 17-maydan 18-mayga oʻtar kechasi Piter Konung (de Konink) va Yan Breydel boshchiligida amalga oshirgan qirgʻini. Fransuz gubernatorining ixtiyoridagi toʻrt mingga yaqin fransuz va horijiy askarlar oʻldirilgan. Bu voqeani “Flandriyaning Varfolomey kechasi” deb ham atashadi. Bu qirgʻin Flandriya shaharlarining umumiy qoʻzgʻaloniga olib kelgan. 11-iyulda qoʻzgʻalonchilar Kurtredagi “Shporlar (tepki) jangi”da (jang yakunida gʻalaba ramzi sifatida fransuz ritsarlarining oltin tepkilari yechib olingan) fransuz qoʻshini ustidan gʻalaba qozongan.