A. M. Karimova, D. M. Malikova pul va banklar

Byudjet jarayoni - Davlat byudjetini tuzish, koʻrib chiqish, qabul qilish va ijro etish, uning ijrosini nazorat qilish, ijrosi haqidagi hisobotni tayyorlash va tasdiqlash, shuningdek Davlat byudjeti tuzilmasiga kiruvchi byudjetlar oʻrtasidagi oʻzaro munosabatlarning qonun hujjatlari bilan tartibga solingan jarayoni.
Byudjet profisiti – muayyan davrda byudjet daromadlarining byudjet xarajatlaridan ortiq boʻlgan summasi.
Byudjet ssudasi - yuqori byudjetdan quyi byudjetga yoxud respublika byudjetidan rezident-yuridik shaxsga yoki chet el davlatiga qaytarish sharti bilan ajratiladigan mablag’.
Byudjet subvensiyasi - qonun hujjatlarida nazarda tutilgan tartibda muayyan maqsadlarga sarflash sharti bilan yuqori byudjetdan quyi byudjetga qaytarmaslik sharti bilan ajratiladigan pul mablag’lari.
Byudjet soʻrovi - byudjet tasnifi boʻyicha tushumlarni shakllantirish va byudjetdan mablag’ ajratish toʻg’risidagi soʻrov.
Byudjet schyotlari - bu byudjet kassasini ijro etish operasiyasini bajarish, toʻlovlarning tushishi va xarajatlarni aks ettirish uchun ochiladigan schyotlar.
Byudjet taqchilligi – muayyan davrda byudjet xarajatlarining byudjet daromadlaridan ortiq boʻlgan summasi.
Byudjet tizimi - turli darajadagi byudjetlar va byudjet mablag’lari oluvchilar yig’indisi, byudjetlarni tashkil etish va tuzish prinsiplarini, byudjet jarayonida ular oʻrtasida, shuningdek, byudjetlar hamda byudjet mablag’lari oluvchilar oʻrtasida vujudga keladigan oʻzaro munosabatlarni ifoda etadi.
Vakolatli bank - xorijiy valyutada operasiyalarni oʻtkazishga Oʻzbekiston Respublikasi Markaziy bankining lisenziyasiga ega boʻlgan tijorat banki.
Valyuta - ital. soʻzdan olingan boʻlib, «qadrlanmoq, qiymat» degan ma’noni anglatadi. Baho, qiymat belgisi boʻlib, mamlakatlarning milliy pul birligi hisoblanadi.
Valyuta birjasi - Oʻzbekiston Respublikasining qonun hujjatlariga muvofiq chet el valyutasini sotish va sotib olish operasiyalarini amalga oshirish huquqiga ega boʻlgan birjasi.