5-маьруза полимер материалларнинг асосий хоссалари. Пластмассалар. Уларнинг компонентлари ва хоссалари. Термик деструкция. Термопластлар. Реактопластлар. Турлари, структураси, асосий хоссалари

Эпоксидли полимерлар эпихлоргидрин асосида органик синтез натижасида олинади. Одатда эпоксид смоласи жигар рангли қовушоқ ҳолда бўлади. Эпоксид смоласи агрессив муҳитларга чидамли, у асосидаги композицион материаллар юқори мустаҳкамликка эгадир.
Эпоксид полимери асосида пасталар, мастикалар, қоришмалар, бетонлар тайёрланади. Эпоксид елимлари билан металл, керамика, ёғоч, шиша, бетон ва бошқа материаллар елимланиши мумкин. Эпоксид полимери асосидаги композицион материаллар иссиққа бардошлилиги 100-150⁰С.
Фуранли полимерлар (фурфурол-ацетонли мономер) фурфурол ва ацетон поликонденсацион синтез қилиб олинади. Мономер тўқ жигар рангли, ўткир хидли суюқлик бўлиб, таркибига 15-25% бензолсулфокислота сингари кучли кислоталар қўшилганда қаттиқ ҳолатга ўтади. Фуран полимеридан тайёрланган композицион материаллар (мастика, қоришма, бетон ва ш.к.) концентрланган кислоталарга чидамли бўлади. Шунинг учун улар кимё саноатида, минерал ўғитлар сақлашда, махсус иншоотлар қурилишида ишлатилади. Фуран полимерлари асосидаги қурилиш буюмларини турар жой биноларида ишлатишга рухсат берилмайди.
Полиэфирли полимерлар кўпасосли кислоталарни спиртлар билан бирга поликонденсациялаб олинади. Хом ашё захираларининг кўплиги, нисбатан арзонлиги, полиэфир полимерлари асосидаги композицион материалларнинг санитария-гигиена талабларига жавоб бериши улардан шишапластиклар, нур ўтказувчан ва рангли безак қопламалари, санитария-техника буюмлари (унитаз, ванна ва ш.к.), фасад учун лок ва бўёқлар тайёрлаш имконини беради.
Полиэфир қоришма ва бетонлари асосида сунъий гранит, мармар ва бошқа безак тошлар олиш мумкин. Полимерлар нордонлаштирувчи концентрланган кислоталарга, хлорли муҳитларга, сувга ва бошқа агрессив қоришмаларга чидамлидир.
Полиамид полимерлари икки асосли кислоталар ва диаминларни поликонденсация реакцияси асосида олинади. Улар гидроизоляция қопламаларида, бетон ва қоришмалар учун модификатор сифатида ва бошқа жойларда ишлатилади.
Полиуретан полимерлари изоционатлар ва кўп атомли спиртлар асосида синтез қилиб олинади. Полиэфир турига қараб юмшоқ эластик ва бикр полиуретан материаллар тайёрлаш мумкин. Полиуретанлар бетонга, асбоцементга, айниқса металларга жуда катта куч билан ёпишиш хусусиятига эга. Полиуретанлар асосида каучуклар, ўта енгил ячейкали бетонлар, иссиқлик изоляцияси ва товуш ютувчи пластмассалар, металл билан тайёрланган уч қатламли енгил панеллар ва бошқа буюмлар олинади.