3-mavzu. Sabzavotlarni marinadlash va sabzavot ikralari tayyorlash

Limon kislotasi bilan marinadlangan bodringlar. Resept:10 kg bodring, 150-200 g urug’li ukrop, 500- 800 g piyoz, 15-20 g xren ildizi, 1 dona sarimsoq boshi. Suyuqlik: 10 l suvga - 375 g tuz, 125 g shakar, 125 g limon kislotasi, 10-15 dona murch doni va xantal, 5-6 dona dafna bargi. Bodringlar bonkaga tig’iz teriladi, 1-3 sarimsoq bo’lakchasi, 1-2 dona kesilgan piyoz xalqasi, xren ildizi bo’lakchasi, ukrop shoxchasi solinadi. Qaynab turgan marinad syuqligi bilan to’ldiriladi va 95°C haroratda pasterizasiya qilinadi: 1-2 litrli bonkalar - 15-20 daqiqa, 3 litrli - 30-35 daqiqa.
Varshavacha marinadlangan bodringlar. Resept:10 kg bodring, 1 dona sarimsoq boshi. Suyuqlik: 9 l suvga - 0.7 l oshxona sirkasi, 150 g tuz, 50-100 g shakar, 10-15 g qora murcha va xantal urug’i, 5-7 dona dafna bargi. Mayda bodringlar bonkaga sarimsoq bilan birgalikda tik holatda taxlanadi. Qaynab turgan marinad syuqligi bilan to’ldiriladi va 95°C haroratda pasterizasiya qilinadi: 1-2 litrli bonkalar - 20 daqiqa, 3 litrli - 30-35 daqiqa.
Sabzavot ikralarini tayyorlash
Pomidorli baqlajon ikrasi. Resept: baqlajon - 2 dona; pomidor - 6 dona; o’simlik moyi - 100 ml; qatiq - 60 ml; sarimsoq - 3 bo’lakcha; tuz - ta’bga ko’ra; petrushka ko’kati - ta’bga ko’ra.
Baqlajonning bandi olib tashlanadi va duxovkada pishirib olinadi. So’ngra po’sti archib tashlanadi, sarimsoq bilan ezg’ilanadi, maydalangan petrushka qo’shiladi va barchasi yaxshilab aralashtiriladi. Pomidor urug’idan tozalanib, qirg’ichdan o’tkaziladi,o’simlik moyi qo’shiladi va o’rtacha olovga qo’yilib, quyilguncha pishiriladi. Shundan so’ng pomidor sovitiladi, baqlajon pyuresi, qatiq, tuz qo’shiladi va barchasi yaxshilab aralashtiriladi.
Pomidor ikrasi. Resept: pomidor - 2,5 kg; olma - 500 g; piyoz, sabzi, shirin qalampir - ta’bga ko’ra; o’simlik moyi - 200 ml; sarimsoq - 1 dona.
Barcha xom ashyolar yuviladi, po’sti archiladi va go’sht qiymalagichdan o’tkaziladi. Aralashmaga tuz solinib, 15 daqiqa qaynatiladi, 200 ml o’simlik moyi qo’shiladi va past olovda tayyor bo’lguncha qaynatiladi. Qaynatish yakunida tozalangan va maydalangan sarimsoq qo’shiladi. Qaynatish yana 15 daqiqa davom ettiriladi, qaynoq bonkalarga quyiladi va darhol qopqog’i berkitiladi. Yopilgan bonkalar to’nkarib qo’yiladi va usti issiq sochiq bilan bir kun o’rab qo’yiladi.