21-боб. Ингичка ичак тутилиши

Антибиотиклар

Ҳайвонларда ўтказилган тажрибаларда антибиотиклар ичакларнинг шикастланишини кечиктириб, ўлим кўрсаткичларини камайтирган. Клиник амалиётда эса консерватив даво таркибига антибиотикларни қўшишга ҳожат йўқ, ичак шикастланишини шубҳа қилсак, операция қиламиз. Операциядан олдин одатдагидек, профилактик мақсадда антибиотик буюрилади. Операциядан кейинги даврда, ҳатто ичакни кесиш бажарилган бўлса ҳам, антибиотикларга эҳтиёж бўлмайди (7 ва 47-боблар). Узоқ муддатли ичаклар гангренаси ва қорин бўшлиғининг турғун инфекциясигина антибактериал давога кўрсатма бўла олади, холос.

Операция

• 
  Қорин бўшлиғига қайта кириш учун қўлланиладиган кесмалар 10 бобда муҳокама этилган. Аммо жуда кўп ҳолларда ўлимга сабаб бўладиган ятроген энтеротомияга йўл қўймаслик учун ниҳоятда эҳтиёт бўлиш зарурлигини қайтариб ўтмоқчимиз. Баъзан қорин бўшлиғига киришга кетган вақт операцияга кетган вақтнинг асосий қисмини ташкил этиши мумкин. Қолган муолажалар унча мураккаб бўлмайди. Бу операцияда юмшоқ қўллар ва оҳиста ишлаш ковбойча усуллардан кўра афзалдир.
  
• 
  Пучайган ингичка ичак қовузлоғини топинг ва у бўйлаб юқорига қараб юринг. У сизни обструкция нуқтасига олиб боради. Беркилишнинг сабабини аниқланг, обструкция оддийгина бойлам ёки ичакнинг букилиб қолиши туфайли чақирилган бўлиши мумкин. Ичакни кенгайган ва пучайган иккита қисмга бўлинган соҳасини ўткир ва ўтмас йўллар билан ажратиш керак.
  
• 
  Ичакнинг қорайган қисмини кесиб олиб ташлашга шошилманг, уни иссиқ, нам салфетка билан ўраб, сабр билан кутинг. Одатда, ичак 10 дақиқа ичида қизариб, одатий тусга кира бошлайди. Агар қизармаса, ичакни кесишга тўғри келади.
  
• 
  Бутун диққатингизни беркилиб қолган ичак қовузлоғига қаратинг. Қолган, жараёнга алоқаси бўлмаган битишмаларни ажратишга ҳожат йўқ. Бу фақат косметик нуқтаи назардан аҳамият касб этиши мумкин, холос. Амалда эса бугун кечган битишмалар эртага яна пайдо бўлади. Тимоти Фабиан айтганидек, барча ингичка ичакни ажратиш шарт эмас, негаки “ичаклар ушбу сурункали битишма жараёнида “очиқ” ҳолда ёпилган”.
  
• 
  Баъзида кўп сонли беркилиш соҳалари аниқланади, уларнинг атрофида кенгайган ва пучайган қовузлоқлар бўлади. Бундай ҳолда шубҳали ичак қисмининг ҳаммаси битишмалардан ажратилиши керак. Яна такрор ва такрор айтамиз: ичакни шикастлаб қўймаслик учун жуда катта эътибор ва эҳтиётлик, сабр ва бардошлик билан ишлаш керак. Кези келганда айтиш жоизки, бу анча зерикарли операциядир.