2 соат Талабалар сони

Ўқитиш воситалари: видеопроектор, электрон доска, ёзув доскаси.

Ўқитиш усуллари: Тушунтириш, ақлий ҳужум.

Ўқитиш шакллари: Коллектив иш

Ўқитиш шароити: Техник воситалар билан таъминланган аудитория.

Мониторинг ва баҳолаш: Оғзаки, тест савол-жавоблари.

1.Хўжалик ҳисоби тўғрисида умумий тушунча
ва унга қўйиладиган талаблар

Ҳар қандай кишилик жамиятининг ривожланиши уни бошқаришни тақозо этади. Бошқариш, ўз навбатида, кишилик жамиятининг турли тармоқ ва соҳаларида юз берган ва бераётган жараёнлар, уларнинг натижалари, хўжалик жараёнларини олиб бораётган субъектларнинг мулки, ушбу мулкни ташкил топтириш манбалари ва бошқа жиҳатлари тўғрисидаги ахборотларни мавжудлигига боғлиқ бўлади. Бундай ахборотларни ўзида мужассамлаштирувчи бошқарув воситаси бўлиб хўжалик ҳисоби ҳисобланади.

Хўжалик ҳисоби негизида, кўриниб турибдики, «хўжалик» ва «ҳисоб» сўзлари ётади.
«Хўжалик» деганда маълум мақсадларга йўналтирилган, ўзининг базиси ва устқурмасига эга бўлган субъектлар тушунилади. Хўжалик сифатида қараладиган субъектлар бўлиб бир бутун мамлакатнинг ўзи ва унинг турли таркибий бўлинмалари, масалан, тармоқлари, соҳалари, минтақалари, ҳудудлари, вазирликлар, бирлашмалар, корхоналар, ташкилотлар, муассасалар ҳисобланади. Мамлакат доирасидаги хўжалик халқ хўжалиги ёки макро иқтисодиёт, унинг энг қўйи бўғинидаги хўжалик эса корхона хўжалиги ёки микро иқтисодиёт деб аталади. Иқтисодиётнинг юқори ва қўйи бўғинлари ўртасидаги хўжаликлар (тармоқлар, соҳалар, бирлашмалар, вилоятлар, туман ва шаҳарлар хўжаликлари) мезоиқтисодиёт сирасига киради.
«Ҳисоб» - бу макро, мезо ва микро иқтисодиёт даражаларида юз берган ва бераётган ҳодиса ва жараёнлар, уларнинг натижалари тўғрисидаги ахборотларни йиғиш, қайд этиш, гуруҳлаш ва узатиш тизими. Демак, ҳисобнинг асосий маҳсули бўлиб ахборот, ҳисоб юритишнинг асосий мақсади бўлиб, бу ахборотларни аниқ, тўлиқ ва ўз вақтида йиғиш, қайд этиш, гуруҳлаш ва фойдаланувчиларга етказиб бериш ҳисобланади.
Шундай қилиб, икки сўз йиғиндисидан ташкил топган «хўжалик ҳисоби» иқтисодиётнинг турли бўғинларида юз берган ва бераётган ҳодиса ва жараёнлар, уларни натижаларини соний ва сифат жиҳатдан характерловчи ахборотларни йиғиш, қайд этиш, гуруҳлаш ва узатиш тизимидир.
Хўжалик ҳисобининг бошқарувда тутган ўрни ва аҳамияти беқиёсдир. Бу бевосита хўжалик ҳисоби томонидан бажариладиган ахборот бериш ва назорат қилиш функцияларида ёрқин намоён бўлади.