2. “Mast qiluvchi ichimliklarni ichishni la’natlash sutrasi” “Vessantara Jataka” asari

Qilmishlarimizning sabablari va oqibatlari sutrasi, bir bobi. Budda nomiga, dxarma nomiga, sanxa nomiga! Shunday qilib men eshitdimki, bir Budda Shravasti shahrining Kisi bog‘ida edi. Ko‘plab rohiblar (shamanlar) va son-sanoqsiz badxisatvalar va ma’budlar bilan birga va son-sanoqsiz boshqa dunyolar bilan birga yig‘ilishgan edi. Dunyolarning buyuk muallimi (Budda) bu majlisni eshittirib sof aql-ma’nosi bilan tushuntirayotgan edi. Shu payt (shunda) Ananda yig‘ilgan barcha insonlar va jonli maxluqlar nomidan, Buddaga — dunyolar sarvariga shunday murojaat etdi: «Ey dunyolar muallimi, men hozir (shunday) ko‘rib turibmanki, odamlar orasida turli-tumanlari tug‘iladi va ular orasida: chiroyli va bad - bashara, kuchli va zaif, boy va kambag‘al, baxtli va baxtsiz, saxiy va xasislari bor. Ularning ovozlari ham, so‘zlari ham bir-biriga o‘xshamaydi. Birov 100 yoshda ham o‘lmaydi, yana birov esa 30 yoshida, birov kichik va yana birov onasining qornida hayotdan ko‘z yumadi.