13-mavzu. Axborot tizimlarini yaratish va boshqarish reja

Axborotga nisbatan talabni belgilash

Tizim tahlilchisi uchun tanlab olingan echimga muvofiq bo‘lgan axborotga nisbatan qo‘yiladigan talablarni aniqlash eng qiyin masala hisoblanadi. YAngi tizimning axborot talablarida ushbu axborot bilan kim, qaerda, qachon va qay tarzda ishlashini aniqlash ko‘zda tutiladi. Ushbu talablarning tahlili yangi yoki modifikatsiyalangan tizim parametrlarini belgilab berib, yangi tizim bajaradigan funksiyalarni batafsil yoritib berishi lozim. Axborot talablari tahlilini o‘tkazishdagi xatolar – yangi tizimlarni yaratish va ulardan foydalanishda ro‘y beradigan muvaffaqiyatsizliklar va ortiqcha xarajatlar yuzaga kelishining asosiy sababchisidir. Axborotga bo‘lgan talablarni tahlil qilishda yo‘l qo‘yilgan xatolarni hisobga olmasdan turib ishlab chiqilgan tizim aksariyat hollarda umuman ishlamaydi yoki jiddiy modifikatsiya qilinishi zarur bo‘ladi.

Ayrim muammolar axborot texnologiyalardan foydalanishni talab etmaydilar, buning o‘rniga boshqaruv usulini o‘zgartirish, xodimlarni qayta o‘qitish yoki mavjud tartibotlarni modernizatsiya qilish lozim bo‘ladi. Agar muammo axborot bilan bog‘liq bo‘lsa, uni aniq belgilash va muvofiq echimni izlash uchun tizimni tahlil qilish talab etiladi.