1. Xalıq bilimlendiriw sisteması haqqında túsinik O`zbekstan, Qaraqalpaqstan aymaqlarında xalıq bilimlendiriw sistemasınıń payda bolıwı hám rawajlanıwı

2. Bilimlendiriwdiń úzliksizligi hám izbe-izligi. O`zbekstan hám Qaraqalpaqstan Respublikalarınıń bilimlen-diriw sisteması birden-bir hám úzliksiz bilimlendiriw sisteması bolıp esaplanadı. Barlıq oqıw-tárbiya mákemeleri mámleketlik bilimlendiriw standartın hám oģan muwapıq dúzilgen oqıw jobaların, oqıw baģdarlamaların turmısqa asıradı. Bul, balalardıń hesh qanday tosıqsız mektepke shekemgi tárbiya mákemelerinen baslawısh mektepke, baslawısh mektepten ulıwma bilim beretuģın orta mektepke, onnan akademiyalıq litsey hám kásiplik kolledjge, olardan joqarı oqıw orınlarına kirip oqıwın táminleydi. Sebebi dáslepki bilimlendiriw túrleri hám basqıshlarında berilgen tálim-tárbiya bunnan keyingi bilimlendiriw túrleri hám basqıshlarında beriletuģın tálim-tárbiyanıń negizi, irge tası bolıp xızmet qıladı. Keyingi bilimlendiriw túrleri hám basqıshlarında berilgen tálim-tárbiya áwelgi bilimlendiriw túrleri hám basqıshlarında berilgen tálim-tárbiyanıń dawamı bolıp esaplanadı. Demek tálim-tárbiya sistemalı túrde úzliksiz hám izbe-iz alıp barıladı. U`zliksiz bilimlendiriw kadrlar tayarlaw milliy modeliniń úshinshi quramlı bólimi etip belgilengen.
3. Ulıwma orta, orta arnawlı hám kásiplik bilimniń minnetliligi. Ulıwma orta (1-1X klass), orta arnawlı hám kásiplik bilimniń (akademiyalıq litsey, kásiplik kolledj) barlıq 6(7)-18 (19) jastaģı oqıwshılar ushın ģalaba minetli bolıwı, ģárezsiz respublikamızdıń qolģa kiritken ullı jeńislerinen biri. Sovet dáwirinde 10 (11) klasstı pitkerip orta arnawlı, kásip-texnikalıq yamasa joqarı oqıw orınlarına kire almaģan jaslar turmıstan sırtta qaldı, qánigeligi bolmaģannan keyin olar hesh bir jerde isley almadı. Endi IX klasstı pitkergen respublikamızdıń hár bir jası májbúriy túrde ya akademiyalıq litseyge ya kásiplik kolledjge; kirip oqıydı. Onı pitkerip óz qánigeligi boyınsha jumıs islewine yamasa ózi qálegen joqarģı oqıw ornına kirip oqıwın dawam etiw múmkinshiligine iye boldı. Bunıń ushın jeterli dárejede akademiyalıq litseyler hám kásiplik kolledjler qurıw kózde tutılıp mámleketlik jobaģa kiritildi. 2005-jılģa shekem akademiyalıq litsey yamasa kásiplik kolledjge kirip oqıw tolıģı menen iske asırıldı.