1. Mineral resurslar bilan ta‘minlanganlik O‘zbekistonning mineral resurslari va ulardan foydalanish

Qo‘rg‘oshin va ruxning Uchquloch, Ko‘lcho‘loq, Qo‘rg‘oshinkon, Kumushkon, Xondiza konlari mavjud. Qo‘rg‘oshin va ruxning o‘zlashtirilgan zaxiralari Uchqulochda 3 million tonna, Xondizada 700 ming t dan ortiqni tashkil etadi. Xondiza konida yana mis, kumush, kadmiy, selen, oltin, indiy aniqlangan.
Temir ma‘danlarning o‘nlab konlari topildi. Tebihbuloq (Qoraqalpog‘iston Respublikasi) titan-magnetit, Temirkon (Jizzax viloyati) gematit-magnetit va magnetit ma‘danli, Surentotin (Toshkent viloyati) magnetit konlari o‘rganilmoqda. Ularning umumiy aniqlangan zaxirasi 130 million tonna dan ortiq.
Marganetsning umumiy aniqlangan zaxirasi 15 million tonna dan ortiq bo‘lgan Dautosh, Qizilbayroq, Taxtaqoracha konlari yaxshi o‘rganilgan. Zarafshon, Hisor tog‘ tizmalaridagi va Qizilqumdagi zaxiralarini o‘rganish davom etmoqda.
Bulardan tashqari respublika yer qa‘ridan litiy, seziy, rubidiy va boshqa elementlarga boy ma‘danlarning ham salmoqli zaxiralari aniqlangan.
Nometall mineral resurslar. Bu turga O‘zbekiston iqtisodiyotida keng qo‘llaniladigan 70 turdan ortiq, asosan kon-ma‘dan, kon-kimyo ashyosi, agrarma‘danlar, shisha-sopol xom ashyosi, qurilish materiallari konlari kiradi.
Fosforit. Markaziy Qizilqumdagi Jeroy-Sardor konining taxminan 90 million tonnali zaxirasi ishlanmoqda. Fosforit zaxirasi 40 million tonna ga yaqin bo‘lgan Qoraxotin va Shimoliy Yetimtog‘ konlari aniqlandi.
Kaliy tuzlarining Tubegatan (aniqlangan zaxirasi 700 million tonna ga yaqin) va Borsa-kelmas manbalari asosida Qo‘ng‘irot soda zavodi ishlamoqda. Dehqonobod kaliy tuzi koni katta zaxiraga ega. Hozirda “Dehqonobod” kaliy o‘g‘itlari zavodining ishlab chiqarish quvvatini 200 ming t dan 600 ming t ga oshirish borasidagi loyihani nihoyasiga yetkazish mo‘ljallanmoqda.
Toshli tuz koni zaxiralari Xo‘jaikon, Tubegatan, Boybichakon, Oqqal’a birgalikda 90 million tonna ga baholangan.
Grafitning O‘zbekistonda 30 dan ortiq turi topilgan. Tasqazgan koni (Navoiy viloyati)ning tadqiq qilingan zaxirasi 2,3 million tonna ga teng.