1-mavzu. O‘zbekiston milliy taraqqiyotining yangi bosqichida fuqarolik jamiyatining shakllanishi va rivojlanishi reja

1.Fuqaro va fuqaroviylik tushunchalarining mazmun-mohiyati va asosiy xususiyatlari
Fuqarolik jamiyati fuqaroviy ong va faollik yuksak bo‘lgan sharoitda barpo etilishi mumkin. Fuqaroviylik mamlakatning turli rivojlanish bosqichlarida, shuningdek jamiyatning bir bosqichdan ikkinchi bosqichga o‘tish davrida yaqqol namoyon bo‘ladi. Hozirgi davrda ijtimoiy-siyosiy o‘zgarishlarni o‘z boshidan kechirayotgan, ya’ni, fuqarolik jamiyati barpo etayotgan turli mamlakatlarda fuqaroviylikning nmoyon bo‘lishi muhim ahamiyat kasb etadi. Fuqaroviy faollikning mohiyatini anglash uchun avvalo fuqaroviylikning mazmun-mohiyatini tushunish talab etiladi.

Turli ilmiy manbalarda qayd etilishicha, o‘z vatani taraqqiyoti uchun har qanday yo‘l bilan, xususan, o‘zining jismoniy yoki ma’naviy mehnati bilan jamiyatga xizmat qiladigan inson haqiqiy fuqaro sifatida e’tirof etiladi. Bu kabi qarashlar biroz falsafiy ahamiyatga kasb etayotgandek tuyulsa-da, aslida fuqarolik jamiyati barpo etishda aynan fuqaroning faoligi muhim omil sifatida ahamiyat kasb etadi.

Fuqaroviylik dastlabki qarashda huquqshunoslikka oid atamadek tuyuladi. Aslini olganda, bu hodisaning falsafiy, huquqiy, sotsiologik va siyosiy mohiyatlari mavjuddir.