1§. Jamiyatni axborotlashtirish va kompyuterlashtirish muammolari

2§. Informatika va axborot texnologiyalari

• 
  Informatika fani to’g’risidagi asosiy tushunchalar;
  
• 
  Axborot texnologiyalari va ularning vazifalari;
  
• 
  Axborot texnologiyalarining rivojlanishi tarixidan. 
  

Tayanch iboralar:
Informatika; Informatikaning ta’riflari; Axborot texnologiyalari; Asosiy ixtirolar va kashfiyotlar; Telegraf; Telefon; Radio; Televidenie; Lazer; Xotiralovchi qurilmalar; Aloqa uzatish vositalari; Kompyuterlar. Rivojlanish davrlari.
Har qanday texnologiyaning asosida ma’lum nazariy va amaliy fanlar yotadi. Xuddi shunday, axborot texnologiyalarining rivojlanishi ham ko’p jihatdan "Informatika" fanining yutuqlariga bog’liqdir.
2.1. Informatika fani to’g’risidagi asosiy tushunchalar
Informatika atamasi lotincha informatic (tushuntirish, xabar berish) so’zidan kelib chiqqan bo’lib, 1960-yillarda EHMlar yordamida axborotlarni qayta ishlash bilan shug’ullanuvchi sohani ifodalovchi atama sifatida ishlatila boshlandi. Lekin, informatika fanining asl mohiyatini ta’riflashda olimlar haligacha yagona bir fikrga kelishganicha yo’q. Hisoblash texnikasi mutaxassislari "Informatika - bu zamonaviy kompyuterlarni hamda ularning dasturiy ta’minotlarini ishlab chiqishning nazariy asoslarini o’rganuvchi fan" deb ta’riflashsa, axborotlar bilan shug’ullanuvchi mutaxassislar esa "Informatika - bu axborotlarlarning turlarini, tarkibini, tuzilishini va xossalarini o’rganuvchi fan" deb ta’kidlashadi.
Akademiklar V. M. Glushkov va V. S. Mixalevichlarning fikrlariga ko’ra "Informatika - bu axborotlarni qayta ishlash jarayonlarini avtomatlashtiruvchi tizimlarni loyihalash, ishlab chiqish hamda xalq xo’jaligiga tadbiq qilishning ilmiy va muhandislik asoslarini o’rganuvchi fandir".
YUNESKOning rasmiy hujjatlarida esa, informatikaga yanada kengroq ta’rif berilgan. Bu ta’rifga ko’ra "Informatika - axborotlarni yig’ish, saralash, tahlil qilish, qayta ishlash, saqlash va iste’molchilarga etkazib berishning zamonaviy usullarini hamda shu jarayonlarni avtomatlashtirishga xizmat kiluvchi yangi elektron qurilmalarni o’rganuvchi fandir".
Ko’rinib turibdiki, informatika fanining vazifalarini to’liq qamrab oluvchi yagona ta’rifga kelish qiyin. Bu esa informatikaning imkoniyatlari hali to’laligicha o’rganilmaganligidan dalolat beradi.
Umuman olganda, kishilik jamiyatimizda "Informatika - axborotlashtirish jarayonlarini hamda shu jarayonlarni avtomatlashtirish usullarini o’rgatuvchi fan" sifatida namoyon bo’lmoqda.
Hozirgi paytda informatika - jamiyatimiznig barcha sohalariga chuqur kirib borayotgan hamda katta sur’atlar bilan rivojlanayotgan fanga aylandi. Birorta fan sohasida qo’lga kiritilgan yutuqlar, informatika sohasidagi kashfiyot va yangiliklarchalik ishlab chiqarishga tez tadbiq qilinmagan.
Buni 2.1-jadvalda keltirilgan ma’lumotlardan ham ko’rish mumkin.
2.1-jadval