1. Фарғона вилояти Транспорт бошқармаси фаолияти, ташкилий тузилмаси, мақсад, вазифалари ва функциялари

4. Фарғона вилояти Транспорт бошқармаси ҳудудида мавжуд бўлган транспорт муаммолари, уларни ечишга қаратилган чора-тадбирлар, истиқболдаги режалар

Ўзбекистон Республикаси Вазирлар Маҳкамасининг қарори билан Ўзбекистонда Транспорт ва логистикани ривожлантириш муаммоларини ўрганиш маркази ташкил этилди.

Вазирлар Маҳкамаси томонидан Транспорт вазирлиги ҳузурида Транспорт ва логистикани ривожлантириш муаммоларини ўрганиш марказини ташкил этиш тўғрисида қарор қабул қилинди.
Марказ қуйидагилар билан шуғулланади: транспорт ва логистика тизимини ривожлантириш муаммоларини ўрганиш, республиканинг транспорт салоҳиятидан фойдаланиш, муаммоларни бартараф этиш бўйича таклифларни ишлаб чиқиш; халқаро транспорт коридорларини ривожлантириш бўйича таклифлар тайёрлаш, йўловчи ва юк ташиш транспорти оқимларини мақбуллаштириш, халқаро ва минтақавий транзитни ривожлантириш; транспорт ва йўл хўжалиги соҳасида хавфсизликни ошириш бўйича таклифлар тайёрлаш, инновацион технологиялар ва интеллектуал транспорт тизимларини жорий этиш; атроф-муҳитга зарарли таъсирни камайтириш, ресурсларни тежаш ва транспортда экологияни яхшилаш бўйича муаммоларни ўрганиш ва таклифлар тайёрлаш; илмий-тадқиқот муассасалари, давлат ва хўжалик бошқаруви органлари, шунингдек, транспорт ва логистикани ривожлантириш муаммоларини ўрганиш бўйича бошқа ташкилотлар билан ҳамкорлик қилиш.
Марказ Давлат бюджети, Транспорт вазирлиги ҳузуридаги Транспорт ва логистикани ривожлантириш жамғармаси маблағлари, жисмоний ва юридик шахсларнинг хайрия эҳсонлари, халқаро молия ташкилотларининг грантлари ва қонун ҳужжатларида тақиқланмаган бошқа манбалар ҳисобидан молиялаштирилади.
Шунингдек, Транспорт вазирлиги ҳузуридаги Транспорт ва логистикани ривожлантириш жамғармаси ташкил қилинди.
Жамғарма маблағлари қуйидаги манбалар ҳисобига шакллантирилади:

• 
  шаҳар, шаҳар атрофи, шаҳарлараро ва халқаро автомобилларда йўловчилар ва юк ташишга лицензия берилганлиги учун давлат божи тўлашдан олинган тушумларнинг 60 фоизи;
  
• 
  Транспорт вазирлигининг ҳудудий бошқармалари инспекторлари томонидан автомобиль ташувчилари соҳасида маъмурий ҳуқуқбузарликлар тўғрисида тузилган баённомалар бўйича ундириладиган жарима тўловлари тушумининг 60 фоизи;
  
• 
  темир йўл транспортида йўловчилар ва юк ташиш бўйича фаолиятни амалга ошириш ҳуқуқини берувчи лицензия берилганлиги учун давлат божининг 20 фоизи;
  
• 
  автомобиль ва темир йўл транспортида йўловчилар ва юк ташиш ҳуқуқи учун лицензия олишга берилган аризаларни кўриб чиқиш, шунингдек, халқаро автомобилда ташишларни амалга ошириш учун рухсатнома бланкалари берилганлиги учун йиғимларнинг 100 фоизи;
  
• 
  шаҳар, шаҳар атрофи ва вилоят ички шаҳарлараро йўналишларини йўлга қўйиш учун тендерларда иштирок этиш учун тўловларнинг 100 фоизи;
  
• 
  «Ўзаэронавигация» маркази» ДК соф фойдасининг 5 фоизи;
  
• 
  Жамғарманинг вақтинча бўш маблағларини Ўзбекистон Республикаси тижорат банклари депозитларида жойлаштиришдан олинадиган даромадлар;
  
• 
  халқаро молия институтлари, хорижий ҳукумат ташкилотлари кредитлари (қарзлари) ва грантлари;
  
• 
  қонун ҳужжатларида тақиқланмаган бошқа манбалар.