|
JOL HÁREKETI QÁWIPSIZLIGIN KÚSHEYTIW ILAJLARÍ DODALANDÍ
Prezident Shavkat Mirziyoyevtiń basshılıǵında 11-fevral kúni jollarda insan qáwipsizligin támiyinlew ilajları boyınsha videoselektor májilisi ótkerildi.
– Bul máseleni keyingi bes jılda birde-bir basshı, birde-bir mákeme qatań itibarǵa alıp dodalamaǵan. Bul taraw boyınsha nızamlar, jumıslar pútkilley qanaatlandırarsız. Jol háreketi qáwipsizligi máselesi bosańlasıp ketken. Bul adamlardıń narazılıǵına sebep bolmaqta, – dedi mámleketimiz basshısı.
Elimizde 2021-jılı 10 mıńnan aslam jol-transport hádiysesi júz berip, olarda 9 mıńnan zıyat adam jaraqatlanǵan. Eń ashınarlısı, 2 mıń 500 ge shamalas adam qaytıs bolǵan.
Talqılawlarǵa bola, jollardaǵı apatshılıqlardıń 25 procenti joldıń jaǵdayı jaman bolǵanı hám infrastrukturası aqılǵa uǵras shólkemlestirilmegeni aqıbetinde kelip shıqpaqta. Máselen, Pop penen Turakorǵan, Jarqurǵan hám Denau, Samarqand penen Ǵuzar arasındaǵı jollar, A-373 jolınıń Yozyovan rayonınan ótken bóleginde hár jılı onlaǵan adamlar qaytıs bolmaqta. Ókinishlisi, bunday qáwipli kósheler hár bir wálayat, hár bir rayon hám qalada bar.
Májiliste jol-transport hádiyseleri kóp júz berip atırǵan aymaqlar kórsetip ótilip, juwapkerlerge intizamıy jaza sharaları belgilendi. Namangan wálayatı ishki isler basqarmasınıń baslıǵı, Ándijan hám Samarqand wálayatları jol háreketi qáwipsizligi basqarmalarınıń baslıqları lawazımınan bosatıldı.
Atap ótilgenindey, transport hádiyseleriniń kópshiligine aydawshılardıń jol qaǵıydaların qastan mensinbewi hám tájiriybesizligi, piyadalardıń qaǵıylarǵa ámel etpewi de sebep bolmaqta. Sonlıqtan, bıyıl barlıq aymaqlarda «Qáwipsiz jol hám qáwipsiz piyada» ulıwma milliy baǵdarlaması ámelge asırılatuǵını atap ótildi.
Nızamshılıq palatası hám juwapker uyımlarǵa jol háreketine baylanıslı nızam hújjetlerin qayta kórip shıǵıp, túp tiykarınan jetilistiriw wazıypası qoyıldı. Sebebi qopal qaǵıydabuzarlıqlar, olardı qayta islew jaǵdayları kóbeygen.
Jaza tartılıwın támiyinlew maqsetinde bunnan bılay da hár bir huqıqbuzarlıq ushın járiyma balları sisteması engiziliwi belgilendi. Máselen, aydawshı tezlikti asırsa, 1 ball, qızıl shıraqtan ótse, 3 ball esaplanadı. Eger bir jılda jámi qaǵıydabuzarlıqlar 12 balldan assa, aydawshı avtomobil basqarıw huqıqınan ayrıladı hám qayta imtixan tapsıradı.
Bunnan tısqarı, aydawshılardıń juwapkerligin májbúriy qamsızlardırıwda tólenetuǵın qamsızlandırıw tóleminiń muǵdarın járiyma ballarınan kelip shıǵıp belgilew tártibi engiziledi.
Sonday-aq, avtomobildi tártipsiz basqarıp, basqa aydawshılarǵa kesent bergeni ushın óz aldına «jol biyzarılıǵı» degen jańa juwapkershilik túri kirgiziledi.
Mámleketimiz basshısı jol háreketi qaǵıydaları gónergenin atap ótip, olardı xalıqaralıq standartlar tiykarında, qánigeler hám aydawshılardıń pikirin úyrengen halda jańalaw boyınsha tapsırma berdi.
Májiliste aydawshalardı tayarlaw hám imtaxan alıw máselelerine de ayrıqsha itibar qaratıldı.
Elimizde avtotransport quralları jıldan-jılǵa kóbeyip, aydawshılardıń qánigelik dárejesi hám óz-ara húrmeti, kerisinshe tómenlep barmaqta. Jol-transport hádiyseleriniń 75 procentin 35 jasqa shekemgi aydawshılar islegen. Avtomekteplerde oqıtılıp atırǵan kitaplar menen oqıw baǵdarlamaları eskishe.
Sonlıqtan, bunday mekteplerde bilimlendiriwdiń sapasın qadaǵalaw wazıypası Ishki isler ministrligine júklendi. Avtomektepler hám imtixan oraylarına bolǵan talaplardı qayta kórip shıǵıw, aydawshılıqqa oqıtıwdıń nátiyjeliligi hám oqıtıwshılardıń qánigeligin arttırıw boyınsha kórsetpeler berildi.
Transport aǵımın basqarıwdıń eń nátiyjeli jolı – sanlastırıw. Biraq bul baǵdardaǵı jumıslar jetkilikli emesligi atap ótildi.
Atap aytqanda, «sanlı basqarıw» Tashkent qalasındaǵı jámi 602 kesilispeden tek ǵana 111 inde bar. Basqa qalalarda bolsa bunday sistema joq.
Tashkent qalası hákimligine paytaxt jollarında háreket basqarıwın sanlastırıw, eki jılda barlıq kesilispelerdi sanlı sistemaǵa ótkeriw wazıypası qoyıldı. Aymaqlarda sonday sistemanı engiziw wálayat hákimlerine júklendi.
Nókis qalası hám walayat oraylarında jol háreketin basqarıw hám qáwipsizligin támiyinlew boyınsha aymaqlıq koncepciyalar islep shıǵıw zárúrligi atap ótildi.
Májiliste jollardıń jaǵdayı hám infrastrukturasındaǵı mashqalalar da talqılandı.
Ótken jılı jol háreketine baylanıslı máseleler boyınsha xalıqtan 10 mıńnan zıyat múrájat bolǵan. Sonıń ishinde, transport háreketi kóp bolǵan 2 mıńnan aslam kesilispe hám 10 mıńǵa shamalas piyada ótiw jolı svetofor yamasa basqa da qurallar menen támiiynlenbegen. Elatlı punktlerde 15 mıń kilometrge jaqın piyada hám velosiped jolları jetispeydi.
Bunnan tısqarı, jol belgisi hám kórsetkishleriniń yarımı gónerip ketken. Oálayat hákimliklerine qaraslı jol belgileri hám svetoforlar ornatıwǵa juwapker kárxanalardıń kóp texnikası gónergen. Endi bul kárxanalar usı aymaqtaǵı jol háreketi qáwipsizligi basqarmasına ótkeriliwi belgilendi.
Wálayat hám rayon oraylarında jol belgileri, svetofor hám jaqtılandırǵıshlar ornatıw, sızıqlar sızıw, piyadalar jolın belgilew, ulıwma, jollardı tártipke salıwǵa tek ǵana Jol háreketi qáwipsizligi sisteması juwapker boladı. Bul jumıslardı qarjılandırıw ushın sistemada «Qáwipsiz jol hám qáwipsiz piyada» respublikalıq hám wálayat qorları shólkemlestiriledi.
Bunnan tısqarı, jol belgilerin islep shıǵıwda «Avtojol»dıń monopoliyası biykar etiledi hám bul tarawǵa isbilermenler tartıladı.
Mámleketimiz basshısı kóshelerdegi háreketti aydawshılar hám piyadalar ushın qolaylı shólkemlestiriw boyınsha kórsetpeler berdi.
– Jollarda tártip-qaǵıydalar ilimiy tiykarlanǵan bolıwı kerek. Iri qalalardaǵı oraylıq kóshelerde tezlik sheklewlerin aqılǵa uǵras belgilew zárúr. Sonıń ishinde, mektep hám baqshalardıń aldında tezlik 30 kilometrden aspawı shárt. Ayırım háreket kóp kóshelerde bolsa házirgi 70 kilometr saattan 60 kilometrge shekem túsiriw zárúrligi bar, – dedi Shavkat Mirziyoyev.
Do'stlaringiz bilan baham: |
