|
ÓZBEKSTAN PREZIDENTI JOQARI EVRAZIYA EKONOMIKALIQ KEŃESI JIYNALISINDA QATNASTI
Ózbekstan Respublikası Prezidenti Shavkat Mirziyoev 14-oktyabr' kúni Joqarı Evraziya ekonomikalıq keńesiniń videokonferenciya formasındaǵı náwbetten tısqarı jıynalısında qatnastı.
Ilaj Ózbekstan 2020-jıl dekabr ayında Evraziya ekonomikalıq birlespesi janındaǵı baqlawshı mámleket statusın alǵanınan berli bul integraciyalıq birlespeniń mámleketimiz basshısı qatnasıwında ótken úshinshi sammiti boldı.
Qazaqstan Respublikası Prezidenti Qasım-Jomart Toqaev basshılıǵında ótken sammitte Armeniya Respublikası Bas ministri Nikol Pashinyan, Belarus Respublikası Prezidenti Aleksandr Lukashenko, Rossiya Federaciyası Prezidenti Vladimir Putin, Qırǵızstan Respublikası Prezidenti Sadir Japarov, JEEK janındaǵı baqlawshı mámleket - Kuba Respublikası Prezidenti Migel Bermudes hám Evraziya ekonomikalıq komissiyası Komissiyası baslıǵı Mixail Myasnikovich qatnasdı.
Jıynalıs kún rejiminen kóp tárepleme ekonomikalıq sheriklikti jáne de bekkemlew, sonıń menen birge, sawda, sanaat kooperaciyası, transport-tranzit potencialın rawajlandırıw, azıq-awqat qáwipsizligi, sanlastırıw, “jasıl” ekonomika hám basqa ústin turatuǵın baǵdarlar boyınsha ámeliy sheriklikti ilgeri jıljıtıw máseleleri orın aldı.
Mámleketimiz basshısı óz sóylewinde Ózbekstannıń tábiyiy sawda hám ekonomikalıq sherikleri – EEEK mámleketleri menen óz ara mápli sheriklikti rawajlandırıwdıń ústin turatuǵın baǵdarların belgilep berdi.
Atap aytqanda, pandemiya sharayatlarında mámleketimizdiń Shólkemge aǵza mámleketler menen tovar almasıw kólemi turaqlı artıp baratırǵanı aytıp ótildi. Evraziya ekonomikalıq komissiyası menen aktiv sheriklik jolǵa qoyıldı, qospa Isshi topar óz iskerligin basladı. Bunnan tısqarı, Evraziya rawajlanıw banki menen sheriklik boyınsha perspektivalı joybarlar tayarlanıp atır.
Sawda-ekonomikalıq baylanıslardı jolǵa qoyıw boyınsha umtılıw-háreketlerdi aktivlestiriw zárúrli ekenin ayrıqsha belgilep, Ózbekstan jetekshisi óz ara sawdada ámeldegi tosqınlıqlardı saplastırıw, texnikalıq reglament hám standartlardı sáykeslestiriw, bajıxana tártibin sanlastırıw boyınsha qospa “jol karta”sın islep shıǵıw usınısın ilgeri qoydı.
Ózbekstan sanaat kooperaciyasın tereńlestiriw arqalı regionlararalıq qosılǵan baha shınjırların jaratıwda sheriklikti keńeytiwden mápdar ekeni belgilendi. Tashkent qalasında hár jılı “Innoprom - Oraylıq Aziya” sanaat forumınıń ótkeriliwi onıń ushın jańa múmkinshilikler ashadı.
Prezidentimiz milliy ekonomikalardıń turaqlı rawajlanıwda zárúrli faktor retinde transport koridorları tarmaǵı hám logistika infradúzilmesin jetilistiriw zárúrli ekenine itibar qarattı.
Mámleketimiz basshısı Ózbekstan tárepinen Rossiya hám Qazaqstan menen birgelikte jolǵa qoyılıp atırǵan zárúr tovarlardı tez pursatda óz ara jetkiziw boyınsha “Agroekspress” joybarına qosıwǵa usınıs etti.
Azıq-awqat qáwipsizligin támiyinlew máseleleriniń ayrıqsha aktual áhmiyetin esapqa alıp, Ózbekstan Prezidenti buǵan baylanıslı umtılıw-háreketlerdi birlestiriw hám qospa sheriklik baǵdarlamasın islep shıǵıw arqalı tarawdaǵı sherikliktiń jańa noqatların izlew zárúrli ekenin aytıp ótti.
Mámleketimiz EEEK sheńberindegi sanlı transformaciya proceslerinde qatnasıw, ámeliy tájiriybe almasıw hám aldınǵı texnologiyalardıń óz ara transferinen mápdar ekeni belgilendi.
Mámleketimiz basshısı ekologiya máselelerine ayrıqsha itibar qaratıp, ıqlım ózgeriwi aqıbetlerin jumsartıw boyınsha óz ara muwapıqlasqan sharalar zárúr ekenin aytıp ótdi.
Ózbekstan Prezidenti sherik mámleketlerdi Aralboyında ekologiyalıq innovaciyalar hám texnologiyalar aymaǵın jaratıw boyınsha qospa joybarlarda aktiv qatnasıwǵa shaqırdı hám de kelesi jıl sentyabr ayında Nókis qalasında ótkeriletuǵın “Jasıl” energetika boyınsha xalıqaralıq forumǵa usınıs etti.
Bunnan tısqarı, birlespe sheńberinde jaratılǵan Iqlım máseleleri boyınsha joqarı dárejedegi isshit opar menen sheriklikti jolǵa qoyıw baslaması ilgeri súrildi.
Ózbekstan jetekshisi sóziniń juwmaǵında sammit juwmaqları EEEK mámleketleri menen óz ara mápli sheriklikti jıljıtıwǵa xızmet etiwine isenim bildirdi.
Do'stlaringiz bilan baham: | 
