|
NAWAYÍ WÁLAYATÍ – JURTÍMÍZ GAWHARÍ, SANAAT DRAYVERI BOLÍP QALA BEREDI
Prezident Shavkat Mirziyoyev orınlardaǵı qurılıs jumısları, iri joybarlar menen tanısıw, xalıq penen ushırasıw maqsetinde 13-oktyabr kúni Nawayı wálayatında boldı.
Shavkat Mirziyoyev dáslep Nawayılı saylawshılar menen ushırastı.
Sonnan keyin mámleketimiz basshısı Nawayı qalasındaǵı “Jumısqa márhamat” monoorayın barıp kórdi.
Oray Prezidentimizdıń 2020-jıl 11-avgusttaǵı “Kámbaǵal hám jumıssız puqaralardı isbilermenlikke tartıw, olardıń miynet aktivligin arttırıw hám kásip-ónerge oqıtıwǵa qaratılǵan hám de xalıq bántligin támiyinlewge tiyisli qosımsha ilajlar haqqında”gi qararına muwapıq islengen. Bul jerde miynet bazarı talapları tiykarında xizmet kórsetiw, qurılıs, awıl xojalıǵı hám texnika tarawlarındaǵı otızǵa jaqın kásipke tayarlaw jolǵa qoyılǵan.
Monoorayda kitapxana, jıynalıslar zalı, 30 oqıw, kompyuter hám ámeliyat xanası, 200 orınlı jataqxana, avtomobil turatuǵın orın bar. Oqıw hám shınıǵıw bólmeleri tiyisli úskene, kompyuter, mulyaj hám basqa úskeneler menen támiyinlengen.
Jıllıq oqıtıw quwatı 3 mıń 400 di quraytuǵın bul orayda 97 jumıs ornı jaratılǵan.
Mámleketimiz basshısı oraydaǵı shınıǵıwlardı kózden keshirdi, jaslar menen sáwbetlesti.
- Jumıssız puqaralarımızdı kásip-ónerli etip, turmısqa jollanba beriw ushın mine usınday sharayatlardı jaratıp atırmız,- dedi Shavkat Mirziyoyev.- Bunnan ónimli paydalanıp, kásipti jaqsı úyrenseńiz, sizler jumıstı emes, jumıs sizlerdi izleydi, tabısıńız joqarı boladı. Neshe jasqa shıǵıwına qaramastan, oqıǵan, ızlengen, kásip iyelegen adam qádirli boladı. Men sizlerdiń sonday qádirli bolıwıńızdı qáleymen.
Ekonomika tarmaqlarında maman qánigelerge talap artıp baratırǵanı, bul jerde oqıǵan jaslar keleshekte jumısqa alınıwı atap ótildi.
- Úlken-úlken kárxanalar qurıp atırmız, kóbisinde sırt elden kelgen qánigeler islep atır. Biziń maqsetimiz - ózimizdiń jaslardı isletiw, xalqımızǵa aylıq beriw. Onıń ushın waqtıńızdı biykar ótkermey, ózlerińizdi de, ustazlarıńızdı da qıynap, kásipti jetik iyelewińiz kerek,- dedi Prezident.
Mákeme mámleket-jeke sheriklik sistemasında isleydi. Mámleket sharayat jaratıp, ilimiy hám materiallıq tárepten támiyinleydi. Shınıǵıwlardı ámeliyatshılar, isbilermenler, zavodlar wákilleri júrgizedi hám keyinirek pitkeriwshilerdi jumısqa aladı. Monooray diplomı kásip-óner mektepleri diplomı menen birdey dárejege iye.
Sonıń menen birge, orayda inglis, rus, yapon, koreys tillerin oqıtıw kursları da ashılǵan.
Búgingi kúnde 300 tıńlawshı 26 kásip-ónerge oqıtılıp atır. Olardıń 62 si “Hayallar dápteri”, 71 i “Jaslar dápteri”ine kirgizilgen jumıssız hám jumıs izlep júrgen puqaralar esaplanadı.
Mámleketimiz basshısı Nawayı qalasındaǵı “Farhod” mádeniyat sarayında wálayattaǵı milliy mádeniy oraylar wákilleri menen ushırastı.
- Sizlerge málim, jurtımızdaǵı awızbirshilik, tatıwlıqtı bekkemlewge ayrıqsha itibar berip atırmız. Bunıń nátiyjesinde turmısıńızda neler ózgerdi? Qanday mashqalalar, qanday usınıslar bar? Usılar haqqında sizler menen júrekten sóylesiw ushın keldim,- dedi Prezident.
Kóp milletli Nawayı wálayatı - xalıqlar doslıǵı hám óz ara túsiniwshiliktiń ayqın kórinisi. Ózbek, qazaq, qaraqalpaq, tájik, orıs, koreys hám kóplegen basqa millet wákilleri bir shańaraq aǵzaları sıyaqlı jasap, jurtımız rawajlanıwına múnásip úles qosıp kelmekte. Wálayatta 8 milliy mádeniy oray xızmet kórsetip atır. Mekteplerde oqıtıw 7 tilde jolǵa qoyılǵan.
Ushırasıwda qatnasqan túrli millet hám elat wákilleri olardıń oqıp, islewi, mádeniyatın saqlawı ushın keń sharayat jaratılǵanın atap ótti. Ózleri, perzentleri erisip atırǵan tabıslar haqqında aytıp berdi. Mádeniy oraylar ushın ımaratlar ajıratılǵanı, 30-iyul mámleketimizde Xalıqlar doslıǵı kúni etip belgilengeni aytıp ótildi.
- Búgin saylawshılar menen ushırasıwda bul qutlı bayramdı kelesi jılı Nawayı wálayatında úlken saltanat penen bayramlaw usınısın bildirdim,- dedi Shavkat Mirziyoyev.- Sonıń menen birge, 2022-jılda Nawayıda kóp milletli xalqımız birliginiń simvolı retinde Doslıq baǵın dúziwdi rejelestirgenbiz.
Prezident jurtımızda jasap atırǵan barlıq millet hám elat wákilleri ortasında óz ara húrmet hám awızbirshilik ortalıǵın bekkemlew, túrli diniy konfessiyalar ushın zárúr sharayatlar jaratıwǵa qaratılǵan siyasat izbe-iz dawam ettiriliwin aytıp ótti.
Do'stlaringiz bilan baham: | 
