Rekreatsiya tushunchasi. Rekreatsiya va dam olish. Reja: Rekreatsiya xozirgi davrning ijtimoiy-madaniy fenomeni sifatida

REKREATSIYA TUSHUNCHASI. REKREATSIYA VA DAM OLISH.
Reja:
1. Rekreatsiya xozirgi davrning ijtimoiy-madaniy fenomeni sifatida
2. Rekreatsiyaning ijtimoiy-iqtisodiy mohiyati va asosiy funksiyalari
Rekreatsiya (polyak tilida rekreacja – dam olish, lotin tilida recreation – qayta tiklash ma’nosida) – bu: 1) bayramlar, ta’tillar; 2) o‘quv muassasalarida dam olish xonasi; 3) dam olish, insonning mehnat jaryonida yo‘qotgan kuchini qayta tiklash demakdir.
Ushbu jarayonni tadqiq qilish bilan bilimning turli tarmoqlari mutaxassislari – geograflar, biologlar, psixologlar, ekologlar, tibbiyotchilar, sotsiologlar, iqtisodchilar shug‘ullanadilar. SHuning uchun ham, rekreatsiya faoliyatiga taalluqli bo‘lgan tushunchalar doirasini aniqlash ancha qiyinchilik tug‘dirishini aytib o‘tish kerak.
Rekreatsiya geografiyasi – 1) odamlarning ish vaqtidan tashqari faoliyatini tashkil qilishning hududiy tizimi amal qilishi va rivojlanishi geografik qonuniyatlarini o‘rganuvchi fan; 2) hududiy rekreatsiya tizimlarini o‘z tadqiqot ob’ekti sifatida o‘rganuvchi va modellashtiruvchi geografik predmetdir.
Rekrealogiya – 1) inson ekologiyasiga asoslangan rekreatsiya tizimlari to‘g‘risidagi predmetlararo fan; 2) insonning xayotiy kuchini qayta tiklash jarayonlari va usullari to‘g‘risidagi fan.
Demak, rekreatsiya – bu qayta tiklash, sog‘lomlashtirish va faoliyatning bu turlari amalga oshiriladigan makondir.
Rekreatsiya va turizm birgalikda keladi: rekreatsiyaga o‘z yashash joyini o‘zgartirish bilan bog‘liq bo‘lmagan barcha faoliyat turlari kiradi; turizm esa –o‘qish, ishbilarmonlik turizmi, davolash rekreatsiyasi, shop-turlar, siyosiy turizm. Binobarin, ularning birlashadigan zonasi qayta tiklanish, sog‘lomlashtirish, relaksatsiya, dala hovlida dam olish, hajga borish, ekoturizmga yo‘naltirilgan turizmning barcha turlari hisoblanadi.
2. Rekreatsiyaning ijtimoiy-iqtisodiy mohiyati va asosiy funksiyalari
Rekreatsiya inson normal turmush tarzining zaruriy sharti bo‘lib, ruhiy zo‘riqishni o‘rnini qoplash, mehnat qobiliyatini tiklash vositasi va ishlab chiqarishda qatnashishni davom qildirishning sharti hisoblanadi.