1-oktyabr uchun Ssenariy Intro (musiqa) Raqs (xorazmcha)

1-oktyabr uchun
Ssenariy
1 . Intro (musiqa)
2. Raqs (xorazmcha)
3. Boshlovchilar: Musiqa sadolari ostida boshlovchilar she`r o`qib sahnaga ko`tariladi;
Xurshidbek:
Qalbimda ehtirom, bitayin doston,
Qadrdon ustozim, sizsiz mehribon,
Hayotim kitobin yoritib turar,
So`zingiz shiordir bizga har qachon!
Mashhura:
Zulmatni yoritgan chiroq o`zingiz,
Ezgulikka chorlar ustoz so`zingiz,
Jamiyatda munosib o`rin olgaydir,
Siz tarbiya etgan o`g`il-qizingiz !
Xurshidbek:
Assalomu alaykum aziz ustozlar va bayram tadbiri mehmonlari!
Mashhura:
Assalomu alaykum, mehribon murabbiylar! Hush kelibsizlar ! Qadamlaringizga hasanot!
Xurshidbek:
Bugun biz o`z qalb qo`rini, ko`z nurini, mehr-muhabbati-yu kelajagini buyuk yurtga barkamol avlodlarni – komil insonlarni tarbiyalashdek ma`suliyatli vazifani zimmalariga olib, bu olijanob ishni sharaf bilan bajarishga bel bog`lagan ustozlarimizni, muallim-u murabbiylarimizni qutlash, e`zozlash maqsadida to`planganmiz!
Mashhura:
O`qituvchilik azal-azaldan e`tiborli kasb hisoblanadi. Haqiqatdan ham ustozlarni qancha madh etsak shuncha kamdir! Mustaqillikka erishganimizdan so`ng bu sharafli kasb egalarining bayram kunlarini yurtimiz miqyosida tantanali qarshi olish odat tusiga aylandi. Shu boisdan biz bugungi bayram dasturimizni “Mehnati elda aziz ustozim” deb nomladik!
Xurshidbek:
Aziz ustozlar! Bugun aynan sizga va siz uchun ushbu bayram dasturini tayyorladik! Bayram dasturimizni ochib berishlari uchun so`z navbatini Jizzax Davlat Pedagogika Universiteti, “Matematika va informatika” fakulteti dekani , pedagogika fanlari bo`yicha Falsafa Doktori(PhD), dotsent Jamshid Baxtiyorovich Ergashev ga beramiz! Marhamat ustoz!

Fakultet dekanidan so`ng dekan o`rinbosarlariga ham so`z beramiz!

Mashhura:
Bugun barcha madhlar-u, barcha kalomlar faqat sizlar uchun aziz ustozlar. Navbat sizlar uchun tayyorlangan bayram dasturining badiiy qismiga. Keling hozir shogirdlaringizning sizni madh etuvchi she`rlarini tinglasak.

Shu so`zdan keyin she`r yod olganlar sahnaga chiqadi
Xurshidbek:
Darhaqiqat! Biz sizdek aziz ustozlarimiz uchun bir-biridan go`zal bo`lgan she`rlar guldastasini hozirlab qo`yganmiz va marhamat ajoyib she`rlardan bahramand bo`ling! Bugungi shodiyona, kuy, qo`shiq va raqslar sizlar uchun yangraydi!!!