Ўзэнергоинспекция” хонани кўмир билан хавфсиз иситиш бўйича қЎлланма тошкент 2019 йил

“ЎЗЭНЕРГОИНСПЕКЦИЯ”


ХОНАНИ КЎМИР БИЛАН ХАВФСИЗ ИСИТИШ БЎЙИЧА
ҚЎЛЛАНМА

Тошкент 2019 йил

ХОНАНИ КЎМИР БИЛАН ИСИТИШНИНГ САМАРАЛИ УСУЛЛАРИ.
Энг кўп тарқалган қаттиқ ёқилғи кўмир ҳисобланади. Кўмир билан хоналарни узоқ муддат бир меъёрда иситилиши таъминланади. Печни кўмир билан тез ва қийинчиликларсиз ёқиш учун бир неча қоидаларни билишингиз зарур.
ҚАНДАЙ ПЕЧЛАРДА КЎМИРДАН ФОЙДАЛАНИШ МУМКИН?

“Голланд печи” кўмирда иситиш учун мослашмаган. Бундай печда кўмирдан фойдаланилгандан сўнг ҳолати ёмонлашади, юқори ҳарорат туфайли печнинг ташқи ва ички қисмлари деформацияланади (қийшаяди), дудбўронларда қурум тўпланиб қолади.

Ғиштли печда икки ҳолатда — ўчоғи ўтга чидамли ғишт билан ёки ички девори қалинлиги камида ярим сантиметр пўлат билан қопланган бўлса кўмир ёқиш мумкин. Чунки ўтга чидамли ғишт юқори ҳароратларда ёрилиб кетмайди. Қалин пўлат эса иссиқлик таъсирида деформацияланмайди.
Ушбу турдаги ёқилғи ёқилганда ғишт печларидаги панжара одатдагидан икки қатор паст бўлиши керак. Қўшимча дудбўрон ўрнатилиши талаб қилинади.
Агар ўтинда ёнувчи оддий ғишт ўчоқ тўғри жиҳозланса, унда кўмирдан фойдаланса бўлади.
ПЕЧДА ЁҚИШ УЧУН ҚАНДАЙ КЎМИР ТЎҒРИ КЕЛАДИ?
Кўмирнинг турли ҳиллари мавжуд. Уларни баъзилари саноат мақсадида фойдаланиш учун қулай бўлса, бошқаси иситишда қўл келади.
Лигнит — кўмирнинг энг хом (ёш) тури ҳисобланади. Толали тузилишга эга бўлиб, юқори бўшлиги, тез майдаланиб кетиши билан ажралиб туради. Ундан асосан электрстанциялар ва заводларда фойдаланилади. Лигнит кичик печларни яхши исита олмагани боис, уйларни иситишда самараси паст.
Жигарранг кўмир — бу ёқилғи торф ва углероддан ташкил топган. Таркибида кўп миқдорда сув ва бошқа аралашмалар мавжудлиги туфайли ёнганида ажралиб чиқадиган иссиқлик даражаси паст. Аҳоли томонидан уйларни иситишда фойдаланиш мумкин.