Ózbekstan respublikasí joqarí HÁm orta arnawlí bilimlendiriw ministrligi berdaq atíndaǵÍ qaraqalpaq mámleketlik universiteti

Jaz keler me?
Dawıl boldı úrgin urdı,
Qosımnıń qamısın túrdi,
Duman bastı aspan-jerdi,
Puqaraǵa jaz keler me?

Tamaǵım joq isherime,

Kóligim joq kósherime,
Tósegim joq tóserime,
Biz sorlıǵa jaz keler me?

Janımdı aldı sıran suwıq,

Zarpınan jarıldı uwıq,
Ómirinshe kórgen qorlıq,
Puqaraǵa jaz keler me?

Júrgen jerim Ayırsha ataw,

Ayaǵıma saldı mataw,
Qay waqıtta tarqar tataw,
Bul qorlıqta jaz keler me?

Arqam Toqtas suwı tereń,

Adam barmas úlken ózen,
Bir basımda aqırzaman,
Puqaraǵa jaz keler me?

Kósilip jatar úyim joq,

Iyinge tartar kiyim joq,
Toqıǵan bizlerge buyım joq,
Men sorlıǵa jaz keler me?

Qarańlar hazlı zatıma,

Páryad etken bul dadıma,
Júdegen bul elatıma,
Aqır bir kún jaz keler me?

Zaman
Qarap tursań bul zamanǵa,
Sonday jaysız shıbın janǵa,
Jılǵa, saylar toldı qanǵa,
Álewmet bul qanday zaman.

Malı barǵa hesh nárse emes,

Olarǵa malsız teń kelmes,
Aycań bul waq kún emes,
Qara túnek boldı zaman.

Ata baladan ayırılıp,

Tamaq tabalmay sarılıp,
Qanat-quyrıqtan mayırıp,
Qıyametlik boldı zaman.

Jesir qatın, jetim ullar,

Tentirep botaday bozlar,
Shabaqqa satıldı qızlar,
Hásiret-qayǵı boldı zaman.

Eginlerdi suwıq urdı,

Erte bastan suw qurıdı,
Kimler asıp ketti qırdı,
Qıyan-keski boldı zaman.

Ashtan ólgenler kóp boldı,

Ólikke jılǵa top boldı,
Ashlıqqa awırıw jup boldı,
Qıyan-keski boldı zaman.
Oraqshılar
Polat oraǵı qolında,
Júrgen talaptıń jolında
Atızdıń ońlı-solında,
Júrgen kún-tún oraqshılar.

Belleri tómen búgilip,

Onnan da beter iyilip,
Kózinen jası tógilip,
Zar jılap júr oraqshılar.

Iyninde kúnlik shapanı,

Paqalǵa tırnalıp sanı,
Barqulla qıynalıp janı,
Atızda júr oraqshılar.

Ósken jerine jete almay

Jumıstı taslap kete almay,
Asqar qumlardan óte almay,
Qayǵıda júr oraqshılar.

Tuwǵan jerin saǵınıp,

Qayǵıdan háykel taǵınıp,
Hal sorasqanǵa shaǵınıp,
Qayǵıda júr oraqshılar.

Kóp isleydi, az aladı,

Tánde janı qıynaladı,
Jipsiz kibi baylanadı,
Azapta júr oraqshılar.

Ne qılsın olar qıylanbay,

Jumıs isleydi bir tınbay,
Awıl-eline qayta almay,
Júrgen mınaw, oraqshılar.

Qarasań júzleri sarı,

Orǵanları pisken tarı,
Bul islerge kelip arı.
Júrgen mınaw, oraqshılar.