Ózbekstan respublikasí joqarí HÁm orta arnawlí bilim ministirligi

Tekst variantların salıstırıw. Bul usıl arqalı belgili bir shıǵarma tekstin basqa variantları menen salıstıradı hám tillik ózgeshelikleri, avtordıń kózqarası, kórkem-estetikalıq niyeti shıǵarma ideyasına baylanıslı ashıp beriledi. Jazıwshınıń kórkem shıǵarma tili ústinde islewin úyreniwde, jazıwshı dúzetiwlerin, tilden paydalanıwdaǵı sheberligin belgilewde bul usıl jaqsı nátiyje beredi. T.Qayıpbergenovtıń “Muǵallimge raxmet” povestiniń 1978-jılǵı baspasındaǵı tómendegi úzindegi itibar bereyik:
̶ Kempir-ǵarrıńa nege qaraysań?
Aqsaqaldıń bunısına uyalıńqırap tursam, muǵallim de meniń ishime kirip shıqqanday bılay dedi:
̶ Bul márt jigit, oqıydı.
Ne derimdi bilmedim. Aqır sońı moynımdı kóterip turıp:
̶ Awa, oqıyman, muǵallim, ̶ dedim.
Apam menen aǵam adırayısıp qarastı. Biraq aqsaqal menen muǵallim ketkenshe hesh nárse dep keyiy almadı.
̶ Genjetay balamız edi. Tiymeń shıraǵım, ̶ dedi aǵam bir nárselerdi jazıp atırǵan muǵallimge.
̶ Ólip-ólip kórgen ólim sarqıtı edi. Taslap ket, ̶ dedi apam da jalınıp.
̶ Áketpeymiz, taslap ketemiz, ̶ desip atır muǵallim menen aqsaqal ekewi. ̶ Shúlenbaydıń oljaǵa túsken jayında oqıydı. (250-bet).
Usı povesttiń 2007-jılǵı baspasında tómendegishe keltirilgen:
̶ Kempir-ǵarrıńa nege qaraysań? ̶ degen awıl aqsaqalınıń sorawına ne derimdi bilmey uyalıńqırap tursam, muǵallim de meniń ishime kirip shıqqanday bılay dedi:
̶ Bul márt jigit, oqıydı.
Jáne ne derimdi bilmey biraz turdım da, birden moynımdı kóterip turıp:
̶ Awa, oqıyman, muǵallim, ̶ dedim.
Apam menen aǵam adırayısıp qarasa da, aqsaqal menen muǵallim ketkenshe hesh nárse dep keyiy almadı.
̶ Genjetay balamız edi. Tiymeń shıraǵım, ̶ dedi aǵam bir nárselerdi jazıp atırǵan muǵallimge.
̶ Ólip-ólip kórgen ólim sarqıtı edi taslap ket, ̶ dedi apam da jalınıp.
̶ Áketpeymiz, taslap ketemiz, ̶ desti muǵallim menen aqsaqal teńnen! ̶ Shúlenbaydan tartıp alınǵan jayda oqıydı. (12-bet).
Bul jerde sáwbet muǵallim, aqsaqal, Turdımurat hám onıń ata - anası arasında júz berip atır.