Ўзбекистон Республикасининг «Ҳуқуқбузарликлар профилактикаси тўғрисида»

29-модда. Ҳуқуқбузарликларнинг якка тартибдаги профилактикаси чора-тадбирлари
Ҳуқуқбузарликларнинг якка тартибдаги профилактикаси чора-тадбирлари қуйидагилардан иборат:
профилактика суҳбати;
расмий огоҳлантириш;
ҳуқуқбузарликларнинг содир этилиши сабаблари ва уларга имкон бераётган шарт-шароитлар тўғрисида хабардор қилиш;
ижтимоий реабилитация қилиш ва ижтимоий мослаштириш;
профилактик ҳисобга олиш;
мажбурий даволанишга юбориш;
маъмурий назорат.
Ҳуқуқбузарликларнинг якка тартибдаги профилактикаси қонун ҳужжатларига мувофиқ бошқа чора-тадбирларни ҳам ўз ичига олиши мумкин.

Ш А Р Ҳ

1. Ҳуқуқбузарликларнинг якка тартибдаги профилактикасини амалга оширишда фуқароларнинг ҳуқуқий онги ва маданиятини юксалтириш, уларга ҳуқуқбузарлик учун жазонинг муқаррарлигини англатиш орқали ҳуқуқбузарликлар содир этиш учун журъат этмасликларига эришиш, шунингдек ғайриижтимоий хулқ-атворга эга, ҳуқуқбузарлик содир этишга мойил ва ҳуқуқбузарлик содир этган шахсларни ахлоқан тузатиш, ижтимоий мослаштириш ва ижтимоий реабилитация қилиш долзарб масалалардан биридир.

2. Мазкур масаланинг ижобий ҳал қилинишида ҳуқуқбузарликларнинг якка тартибдаги профилактикасига доир энг мақбул чора-тадбирларни ишлаб чиқиш ва амалга оширилишини самарали ташкил этиш муҳим ўрин тутади. Ушбу қонунга кўра, бундай профилактик чора-тадбирларга: профилактика суҳбати, расмий огоҳлантириш, ҳуқуқбузарликларнинг содир этилиши сабаблари ва уларга имкон бераётган шарт-шароитлар тўғрисида хабардор қилиш, ижтимоий реабилитация қилиш ва ижтимоий мослаштириш, профилактик ҳисобга олиш, мажбурий даволанишга юбориш, маъмурий назорат киритилган. Бироқ бу ҳуқуқбузарликларнинг якка тартибдаги чора-тадбирларини чегараламайди, амалдаги қонун ҳужжатларига кўра бошқа чора-тадбирлар ҳам киритилиши мумкин. Мисол учун, Ўзбекистон Республикасининг 2010 йил 29 сентябрда қабул қилинган «Вояга етмаганлар ўртасида назоратсизлик ва ҳуқуқбузарликлар профилактикаси тўғрисида»ги қонуннинг «Якка тартибдаги профилактика иши олиб борилишини ташкил этиш» деб номланган 23-моддасида вояга етмаганларга нисбатан амалга ошириладиган якка тартибдаги профилактик чора-тадбирлар ўз ифодасини топган.