Ўзбекистон республикасининг қонуни

35-модда. Давлат фуқаролик хизматида фаолият самарадорлигини баҳолаш тизими
Фаолият самарадорлигини баҳолаш тизими давлат органи ва ташкилотининг ва уларнинг давлат фуқаролик хизмати фаолиятининг самарадорлиги ва натижадорлигини баҳолаш комплекс чораларидан иборат.
Давлат фуқаролик хизматчисининг фаолияти самарадорлигини баҳолаш предмети бўлиб ҳисобот даври якуни бўйича у томонидан ўрнатилган индивидуал асосий самарадорлик кўрсаткичига эришиш даражаси ҳисобланади. Ҳисобот даври давлат органи ва ташкилоти томонидан асосий самарадорлик кўрсаткичининг хусусиятидан келиб чиққан ҳолда ўрнатилади.
Асосий самарадорлик кўрсаткичини ишлаб чиқиш ва тасдиқлаш ҳамда унинг прогнозли белгилари баҳоланувчи ходим билан биргаликда унинг бевосита раҳбари томонидан кўриб чиқилади.
Давлат фуқаролик хизматчисининг фаолият самарадорлигини баҳолаш уларни индивидуал асосий самарадорлик кўрсаткичига эришиш даражаси асосида бевосита раҳбарлари томонидан кўриб чиқилади.
Асосий самарадорлик индивидуал кўрсаткичининг эришилган даражасига қараб, давлат фуқаролик хизматчисига қуйидаги баҳолардан бири қўйилади: “намунали”, “аъло”, “яхши”, “қониқарли”, “паст даражада”, “қониқарсиз”.
Давлат фуқаролик хизматчисининг фаолият самарадорлигини баҳолаш тизимини татбиқ қилиш тартиби асосий самарадорлик кўрсаткичи асосида давлат фуқаролик хизмати масалалари бўйича ваколатли орган томонидан тасдиқланади.
 
36-модда. Давлат фуқаролик хизматчиларини рағбатлантириш
Давлат фуқаролик хизматчисига фаолият самарадорлигига эришилган натижадорлиги асосида унга нисбатан қуйидаги рағбатлантириш чоралари қўлланилиши мумкин:
қўшимча устама ҳақи;
малака даражасининг навбатдан ташқари тайинланиши;
миннатдорчилик эълон қилиш;
қимматбаҳо совға ёки ёрлиқ билан мукофотлаш;
Давлат фуқаролик хизматчилари учун бошқа турдаги рағбатлантиришлар ҳам белгиланиши мумкин.
Давлат фуқаролик хизматчиси алоҳида хизматлари учун қонун ҳужжатларида белгиланган тартибда давлат мукофотига тақдим этилиши мумкин.