Ўзбекистон республикасининг фуқаролик процессуал кодекси

406-модда. Кассация шикоятининг (протестининг) мазмуни
Кассация шикоятида (протестида) қуйидагилар кўрсатилган бўлиши керак:
1) шикоят (протест) йўлланаётган кассация инстанцияси судининг номи;
2) шикоят (протест) бераётган шахснинг фамилияси, исми, отасининг исми (номи), унинг яшаш жойи ёки жойлашган ери (почта манзили);
3) шикоят қилинаётган (протест келтирилаётган) ҳал қилув қарори, ажрим, қарор ва ушбу суд ҳужжатларини чиқарган суд;
(406-модда 1-қисмининг 3-банди Ўзбекистон Республикасининг 2021 йил 12 январдаги ЎРҚ-661-сон Қонуни таҳририда - ҚҲММБ, 13.01.2021 й., 03/21/661/0011-сон)
4) ҳал қилув қарорининг, ажримнинг, қарорнинг нотўғрилиги нимадан иборат эканлиги;
5) шикоят (протест) бераётган шахснинг илтимоси;
6) шикоятга (протестга) илова қилинган ёзма материалларнинг рўйхати.
Кассация шикоятини шикоят бераётган шахс ёки унинг вакили имзолайди.
Кассация протести протест келтирган прокурор томонидан имзоланган бўлиши керак.
(406-модданинг 1-қисми Ўзбекистон Республикасининг 2021 йил 12 январдаги ЎРҚ-661-сон Қонуни таҳририда - ҚҲММБ, 13.01.2021 й., 03/21/661/0011-сон)
Кассация шикоятида (протестида) шикоятни (протестни) берган шахснинг ёхуд унинг вакилининг телефонлари ва факслари рақамлари, электрон почта манзили кўрсатилиши мумкин.


407-модда. Кассация шикоятига (протестига) илова қилинадиган ҳужжатлар
Кассация шикоятига қуйидаги ҳужжатлар илова қилинади:
давлат божи ва почта харажатлари тўланганлигини тасдиқловчи ҳужжат;
(407-модда 1-қисмининг 2-хатбошиси Ўзбекистон Республикасининг 2018 йил 11 октябрдаги ЎРҚ-496-сон Қонуни таҳририда - ҚҲММБ, 12.10.2018 й., 03/18/496/2043-сон)
кассация шикояти вакил томонидан имзоланган ҳолларда, уни имзолашга вакилнинг ваколатларини тасдиқловчи ҳужжат.
Прокурорнинг иштирокисиз кўрилган иш бўйича кассация протестига тарафнинг протест келтиришга асос бўлиб хизмат қилган мурожаатининг кўчирма нусхаси илова қилинади.
Кассация шикоятига (протестига) иш бўйича қабул қилинган суд ҳужжатларининг кўчирма нусхалари илова қилиниши керак.
(407-модда Ўзбекистон Республикасининг 2021 йил 12 январдаги ЎРҚ-661-сон Қонунига мувофиқ 2-3-қисм билан тўлдирилган - ҚҲММБ, 13.01.2021 й., 03/21/661/0011-сон)
Суднинг аризани қайтариш ҳақидаги ёки аризани қабул қилишни рад этиш тўғрисидаги ажрими устидан кассация шикоятига (протестига) қайтарилган ариза ва унга қўшиб берилган ҳужжатлар ҳам илова қилиниши керак.