Ўзбекистон республикаси қурилиш вазирлиги ўзбекистон республикаси

12-БОБ. ПАРДОЗБОП СОПОЛ АШЁЛАР


12.1.Умумий тушунча
Уй-жой қурилишида сополдан фойдаланиш милоддан олдинги 4-3 минг йилликларга тўғри келади. Сопол ноорганик, металлмас ва техноген буюмлардир. Ҳозирги вақтда сопол буюмлар ишлаб чиқаришни икки гуруҳга бўлиш мумкин:
1. Табиий хом ашё – тупроқдан тайёрланган анъанавий сопол буюмлар. Бу гуруҳ қурилишда ишлатиладиган сопол буюмларини (пишиқ ғишт, сопол плитка, сопол қувурлар) ўз ичига олади.
2. Замонавий сопол ашёлар сунъий хомашёлар - оксидлар, нитридлар, карбидлардан тайёрланади. Бу гуруҳ электроникада, космик техникаларда ҳамда композицион ашёлар (масалан кермет) олишда ишлатиладиган сополларни ўз ичига олади. Қурилишда ишлатиладиган сопол ашёларига асосан хом ашё сифатида энг кўп тарқалган соғ тупроқлар қўлланилади.
Сополбоп (кулолчилик) тупроқ таркибида каолинит, гидрослюда ва озгина кварц, дала шпати, темир оксиди, каробонатлар бўлган, майда заррачали чўкинди тоғ жинсидир.
Куйдирилган ашёлар ва буюмлар тайёрлашда лойдан ташқари диатомит, трепел, опок ва қум каби жинслар ҳам кўп ишлатилади. Лойдан сопол буюмлар тайёрлаш учун тупроқнинг яроқли эканлиги, унинг кимёвий таркибига ва майда-йириклигига, пластиклик ва иссиққа чидамлилигига қараб аниқланади. Сопол ашёлари олишда лой таркибидаги оксидлар миқдори SiO₂ – 40…50%, Al₂O₃ – 40…50%, Fe₂O₃ – 9…15%, MgO – 0,9…4,0%, CaO - 0,5…2,5%, Nа₂О ва К₂О оралиқда бўлиши керак. Оксидлар миқдорининг ўзгариши билан унинг физик-механик хоссалари, тузилиши ва ранги ҳам ўзгаради.
Масалан, лой таркибида кремний (SiO₂) миқдори ортиб кетса, унинг пластиклик хусусияти камаяди; гилтупроқ (Al₂O₃) сопол буюмларнинг рангини оқартиради ва иссиққа чидамлилигини оширади. Сопол буюмларнинг иссиққа чидамсизлигига ва унинг эриш ҳароратининг пасайишига сабаб ундаги темир оксиди (Fе₂О₃) миқдорининг кўпайшишдир.