Ўзбекистон Республикаси Соғлиқни сақлаш вазирининг

2.1.1. Бел соҳасида ўткир оғриқ/сийдик найидаги тошга гумон қилинган 
беморларни текшириш 
Ҳозирги вақтда бел соҳасида ўткир оғриқлар мавжуд бўлганда стандарт ташхислаш 
усули контрастсиз КТ ҳисобланади. Ушбу усул экскретор урография (ЭУ) ўрнини 
эгаллади. КТ тош ўлчамлари ва зичлигини аниқлашга имкон беради. Агар тош топилмаса, 
қорин оғриғининг бошқа сабабларини қидириш керак. 
Контрастсиз КТ таркибида сийдик кислотаси ва ксантин бўлган, рентген-негатив 
тошларни ташхислаш имконини беради, аммо индинавир препарати туфайли ҳосил бўлган 
тошлар КТда кўринмайди. Бундан ташқари, контрастсиз КТ тошнинг зичлигини, ички 
тузилишини, «тери – тош» масофасини ва анатомик хусусиятларни – даволаш усулини 
танлашга таъсир қилувчи параметрларни аниқлашга имкон беради [11-14]. Шу билан 
бирга, контрастсиз КТнинг афзалликлари билан бир қаторда, унинг буйрак функцияси ва 
юқори сийдик йўлларининг анатомияси ҳақида маълумот бермаслигини, шунингдек, 
юқори дозада нурланишга эга эканлигини ёдда тутиш керак. 
Паст дозали КТни қўллаш орқали нур юкламасини камайтириш мумкин, аммо уни 
одатдаги клиник амалиётга тадбиқ қилиш қийин. Тана вазни индекси (ТВИ) 30дан кичик 
бўлган беморларда сийдик найининг 3 мм дан кичик ўлчамли тошларини ташхислашда 
паст дозали КТ сезгирлиги 86%ни, 3 мм дан катта тошлар учун эса 100% ни ташкил 
этади [15]. Проспектив тадқиқотлар мета-таҳлиллари натижаларига кўра, СТК 
диагностикасида паст дозали КТнинг умумий сезгирлиги 93,1% (95% ИИ 91,5-94,4), 
спецификлиги 96,6% (95% ИИ 95,1-97,7%)ни ташкил этади [16]. 

---

25 
2.1.2. Буйрак тошларини ташхислашнинг инструментал усуллари 
ЭУ буйраклар функцияси, косача-жом тизимининг анатомияси ва обструкция 
даражаси ҳақида маълумот беради. Контрастсиз КТ тезда уч ўлчамли маълумотларни 
олиш ва тошнинг ўлчами ва зичлигини, теридан тошгача бўлган масофани ва атроф соҳа 
анатомиясини аниқлаш имконини беради, лекин шу билан бирга нур юкламаси юқори. 
Паст дозали ва ультра паст дозали протоколлар стандарт текширувларга тенг натижаларни 
беради, фақат жуда кичик ўлчамли тошлар ёки семиз беморлардаги тошларни аниқлаш 
бундан мустасно [15-17].