Ўзбекистон Республикаси Президенти Қарори

Хўжалик юритувчи субъектлар ўртасида тузилган шартномаларни электрон рўйхатдан ўтказиш тартиби тўғрисида
низом
1-боб. Умумий қоидалар
1. Ушбу Низом хўжалик юритувчи субъектлар ўртасида тузилган шартномаларни солиқ тўловчининг шахсий кабинетида электрон шаклда рўйхатдан ўтказиш меъёрлари ва тартибини белгилайди.
2. Ушбу Низомда қуйидаги тушунчалар қўлланилади:
шартномаларнинг электрон реестри – хўжалик юритувчи субъектлари томонидан имзоланган шартномаларни электрон шаклда солиқ тўловчининг шахсий кабинетида рўйхатдан ўтказиш;
шартноманинг электрон идентификатори – реестрга киритилган шартномаларни масофадан идентификация қилиш имконини берувчи ахборот тизими томонидан автоматик равишда белгиланадиган электрон шартноманинг ягона ID рақами;
шартномаларни электрон рўйхатга олиш жараёни иштирокчилари – товар (хизмат)лар реализацияси шартномасини қоғоз ёки электрон шаклларда имзолаган хўжалик юритувчи субъектлар;
QR-код – солиқ тўловчининг шахсий кабинетида рўйхатдан ўтказилган электрон шартномага бириктириладиган, мобил иловалар ва дастурий маҳсулотлар орқали ўқиш (сканерлаш) вақтида электрон шартнома ҳақида барча маълумотларга ҳавола бўладиган махсус график код.
3. Шартномалар солиқ тўловчининг шахсий кабинетидан фойдаланган ҳолда 1-иловада кўрсатилган шаклга мувофиқ электрон рўйхатдан ўтказилади.
4. Шартномаларни электрон рўйхатдан ўтказиш электрон рақамли имзодан фойдаланган ҳолда амалга оширилади.
2-боб. Шартномаларнинг электрон реестрини
шакллантириш тартиби
5. Шартномани рўйхатга олишда қуйидагилар кўрсатилиши шарт:
шартноманинг тури;
шартнома тузилган сана;
шартнома рақами;
шартномани амал қилиш муддати;
томонларнинг реквизитлари (СТИР, корхона номи, манзил, банк номи ҳисоб рақам ва ОКЭД коди);
реализация қилинган товар (хизмат) номи, коди, штрих коди, ўлчов бирлиги, нархи, акциз солиғи суммаси, ҚҚС солиғи суммаси, жами шартнома суммаси.