Ўзбекистон республикаси олий ва ўрта махсус таълим вазирлиги ўзбекистон давлат жаҳон тиллари университети педагогика ва психология кафедраси

Мезотехнология модули- локал технологиялар таълим-тарбия жараёнини маълум бир қисмининг дидактик, тарбиявий, методик вазифаларини ҳал этишга йўналтирилади. Масалан, субъект ва объектнинг алоҳида фаолият турлари, билимларни ўзлаштириш, материалларини такрорлаш, ўқувчилар билимини, тарбияланганлик даражасини назорат қилиш технологияси.
Микротехнология- кичик ҳажм,доирадаги тезкор вазифаларни бажаришга субъектларнинг индивидуал ва ўзаро мақсадли ҳаракатини самарали ташкил этишга қаратилади. Масалан, ёзув кўникмаларини шакллантириш технологияси, шахснинг у ёки бу сифатларини шакллантиришга қаратилган технология.
Педагогик технологиянинг горизонтал тузилмаси эса моҳиятан бир-бири билан алоқадор уч асосий жиҳатдан иборатдир:

1. 
   Илмийлик - у ёки бу технологиянинг педагогика ва бошқа турдош фанларнинг илмий-назарий ғоялари асосида ифодаланишидир.
   
2. 
   Расмий тавсифий-технология олдиндан башорат қилинган натижага эришиш учун мақсад, вазифа мазмун, шакл, метод ва воситалар, фаолият алгоритми, қўлланилган моделлар мажмуаси ифодаланишидир.
   
3. 
   Жараёнли фаолият- таълим-тарбия мақсадига эришиш фаолият жараёнида амалга ошади.Ўқувчи ва ўқитувчининг коммуникатив муносабатлари, таълим-тарбиявий фаолиятни пухта режалаштириш, ташкил этиш, якуний хулоса чиқариш. Бошқариш, натижани тахлил этиш ва баҳолаш айнан амалий фаолият жараёнида намоён бўлади.
   

Шундай қилиб, педагогик технологияларнинг фанга ва таълим-тарбия амалиётига кириб келиши давр талаби, педагогика ва методика фанларининг ривожи, кадрлар тайёрлаш борасида босқичма-босқич амалга оширилаётган чора-тадбирларнинг маҳсулидир.
§2. Педагогик технологиянинг қонуниятлари, тамойиллари ва турлари
Педагогик технологиянинг ўзига хос қонуниятлари ҳам мавжуд бўлиб, уларга ўқув-тарбия жараёнида амал қилиниши замирида педагогик фаолият натижаларида ижобий сифат ўзгариши кафолатланади. “Таълим қонуниятлари таълим жараёнида рўй берадиган ходисалар ўртасидаги ўзаро боғланишлар, уларнинг моҳиятини ифодаловчи шарт-шароит, асосдир” ²