Ўзбекистон республикаси олий ва ўрта махсус таълим вазирлиги урганч давлат университети «технология асослари» кафедраси

11 -Маъруза. Кенг тарқалган йигма бирикмалар, механизм ва деталларни таъмирлаш
Режа:
1. Ажраладиган бирикмаларни таъмирлаш.
2. Ажралмайдиган бирикмаларни таъмирлаш.
3. Сирпаниш подшипникларини таъмирлаш.
4. Тебраниш подшипникли йигма бирликларни таъмирлаш.
5. Вал ва ўқларни таъмирлаш.

Резбали бирикмалар кенг тарқалган ажраладиган бирикмалардан бўлиб, бунда болт тешикка зазор билан киритилади ва бирикма мустаҳкамлиги гайкани қотириш билан таъминланади. Бундай ҳолда гайка тортилаётганда ва ишлатиш вақтида марказлаштириш бузилиши мумкин.

Резбали бирикмаларда қуйидаги нуқсонлар учрайди:
- вибрация ёки ажратиш - йигиш натижасида резба ейилади;
- иш юкланмаси ёки кучли тортиш натижасида резба эзилади;
- бўйлама иш юкланмаси ёки тортиш кучи таъсирида резба қадами ўзгариб, болт стержени узаяди;
- катта ўлчамли калит ишлатиш натижасида болт каллаги ейилади;
- оддий шайба ейилади, пуржинали шайбалар эзилиб синади.
Болт, винт, шпилка, гайкалар, шайбалар сезиларли ейилганда янгисига алмаштирилади.
Йирик деталларни винт, шпилка ёрдамида бириктирганда масалан, электродвигателни майдалагич станинасига ўрнатишда, фақат тешик қайта тикланиб, шпилка ва винтлар янгисига алмаштирилади.
Ички резбали кичик тешиклар қайта тикланганда, тешик ГОСТ бўйича кейинги катта ўлчамга мослаштирилиб, қайта тешилади ва янги резба чиқарилади.
Резбали бирикмаларда деталлар ўзаро зичроқ ёпишиши учун улар орасига ип-газлама, картон ёки қогоз прокладкалар сурик бўктириб қўйилади.
Деталларни бириктирганда одатда болт каллаклари бир томонда, резбали қисми иккинчи томонда бўлиши лозим. Сўнгра гайкалар енгил тортилиб, деталлар ҳолати текширилиб, сўнгра гайкалар қотирилади. Гайкалар очилиб кетмаслиги учун контргайка, махсус шайба, тожли гайкалар ва шплинтлар ишлатилади
Шпонкали бирикмаларда шпонкалар эзилиши, ишчи юзалар ейилиши мумкин. Бунда шпонка янгисига алмаштрилади.
Шпонка ариқчаси ейилганда, ариқча стандарт бўйича кейинги катта ўлчамгача кенгайтирилади ва чуқурлаштрилади. Шпонкали бирикмаларда призмасимон ва сегментли шпонкаларда баландлиги бўйича, понасимон шпонкаларда эса кенглиги бўйича зазор бўлиши лозим.
Зазор қиймати шуп билан назорат қилинади.