Ўзбекистон республикаси олий ва ўрта махсус таълим вазирлиги тошкент кимё-технология институти

Илмий фаразнинг чегара билмаслигини
фараз қилиб бўлмайди.


Д.И.Менделеев

Ҳозирги пайтда олий таълимда талаба ва магистрантларнинг мустақил ишлашларига катта эътибор қаратилган. Биринчи курсданоқ умумий ва анорганик кимёни ўрганишда талабаларни мустақилликка ўргатиш жуда муҳим ҳисобланади.

Мустақил таълим маъруза матнларини уйда қайта ишлаш, лаборатория дафтарини тайёрлаш, масалалар ечиш ва назорат саволларига жавоблар топиш каби жиҳатларни ўз ичига олади. Бунда ушбу қўлланма маъруза курси билан лаборатория практикуми орасидаги боғловчи бўғин сифатида катта амалий аҳамият касб этади.
Қўлланма информацион-маълумотнома характерига эга бўлиб, унда бешинчи гуруҳ қўшимча гуруҳча элементлари бўлими ёритилган, келажакда анорганик кимёнинг ҳамма бўлимларини ўз ичида мужассамлаштиради ва водороддан нильсборийгача бўлган элементлар ҳамда улар муҳим бирикмаларининг физикавий ва кимёвий хоссалари (реакция тенгламалари) баён этилади.
Қўлланмада кимёгар ва мухандис-кимёгарнинг «кимёвий хазинасини» ташкил этиш учун зарур бўлган 100 га яқин ноорганик моддалар мукаммал ёритилган. Моддаларни танлашда уларнинг саноатда муҳимлиги (кимёвий жараёнлар учун дастлабки моддалар, минерал хомашёлар), ўқув-лаборатория амалиётида кенг тарқалганлиги (эритувчи ва реактивлар, сифат таҳлилининг реагентлари) ва кимёвий технологиянинг янги соҳаларида ишлатилиши эътибога олинди.
Ушбу ўқув-услубий қўлланма кимё таълими йўналиши талабалари, анорганик кимё мутахассислиги магистрантлари, аспирантлар, ўқитувчилар, кимё саноатининг илмий ва мухандис-технологлар учун муҳим амалий қўлланма бўлишига ишончимиз комил.
Қўлланмани ёзишда сўнгги йилларда босилган мамлакатимиз ва чет эллик таниқли олимларнинг китобларидан ижодий фойдаланилганлигини эслатиб ўтамиз.
Муаллифлар китобхонларнинг қўлланма ҳақидаги барча танқидий фикр ва мулоҳазаларини мамнуният билан қабул қиладилар ва уларга ўзларининг самимий миннатдорчиликларини билдирадилар.