Ўзбекистон республикаси олий ва ўрта махсус таълим вазирлиги а.ҚОдирий номидаги жиззах давлат педагогика институти

Илмий-маълумотларга сайқал бериш
Курс ишида илмий-маълумотларга сайқал бериш нашр этишга тайёрланаётган илмий ишлар талабларига жавоб бериши керак. Курс ишини ёзиш жараёнида талаба ва магистр шу соҳада мавжуд бўлган ва ўзи фойдаланган бошқа илмий тадқиқотлардан, маълумотномалардан далил келтириши зарур. Илмий-маълумотларга сайқал бериш давомида талаба ва магистр қуйидаги шартларга риоя қилиши лозим:

• 
  курс ишини ёзиш давомида фойдаланилган адабиётлар ва бошқа манбалардан далил келтириш бир хил тартибда ёритилиши керак.
  
• 
  матнда фойдаланилган манбалар саҳифа остида изоҳ тарзида аниқ ва тўлиқ келтирилиши, яъни муаллиф ва адабиётнинг номи, нашриёти, йили ва бети кўрсатилиши лозим.
  
• 
  саҳифа остидаги изоҳ тарзидаги ёзувда вақтли нашрлар, китоблар, мақолалар номи қўштирноққа олинмайди.
  
• 
  саҳифа остидаги изоҳ 1,5 интервалда ёзилиши лозим.
  
• 
  саҳифанинг атрофларига безакли чизиқлар қилиниши шарт эмас.
  
• 
  курс ишлари ўқув жараёни олиб борилаётган тилда ёзилиши керак.
  
• 
  курс ишларини ёзиш жараёнида фойдаланилган адабиёт ва илмий манбалар ҳажми мавзунинг моҳиятини очиб берадиган мазмунда ва даражада бўлиши зарур.
  
• 
  курс ишларини ёзишни қулайлаштириш учун (варақ остига қўйиб ёзиш учун) оқ варақларда, компьютерда, 1,5 интервалли сатр чизиқлари чизиб олиниши мумкин.
  

Илмий-назарий адабиётлардан фойдаланиш
Курс ишини сифатли бажаришнинг муҳим шартларидан бири - танлаб олинган мавзу бўйича мавжуд махсус адабиётларни чуқур ўрганиш ҳисобланади. Бунда кўриб чиқилаётган саволларга тегишли расмий маълумотларни, илмий асарларни, дарсликларни, илмий мақолалар тўпламларини, илмий анжуманлар материалларини, статистик маълумотларни ўрганиб чиқиш зарур. Адабиётларни ўрганиш жараёнида асосий эътиборни биринчи навбатда мақола ёки китобнинг курс иши билан тўғридан - тўғри боғлиқ бўлган қисмларига, яъни бобларга, параграфларга қаратиш керак. Шу билан бирга курс ишини ёзиш жараёнида зарур саволларни тушириб қолдирмаслик мақсадида ҳар бир ўрганилаётган адабиётни бошидан охиригача кўз югуртириб чиқиш лозим.
Адабиётларни ўқиш ва ўрганиш жараёнида курс иши билан боғлиқ бўлган саволлардан парча кўчириб олиш зарур. Ҳар бир парчада унинг манбаси ва манбадаги саҳифаси кўрсатилиши шарт.
Адабиётлар билан танишиш жараёнида муаллиф ўз хулосаларини исботлаш учун фойдаланган таҳлилнинг техник усулларини, яъни жадваллар, шакллар, статистик маълумотларни гуруҳларга бўлиш ва бошқаларни ёзиб қўйиши зарур. Чунки, уларнинг баъзи бирларидан курс ишини ёзиш давомида фойдаланиш мумкин. Ўрганилаётган адабиётлардан кўчириб олинаётган парчаларни алоҳида қоғознинг фақат бир томонига, ёзув учун ҳошия қолдирган ҳолда ёзиш мақсадга мувофиқдир. Адабиётлар билан танишиш жараёнида вужудга келган ғояларни шу ҳолдаёқ ёзиб қўйиш мумкин.