Ўзбекистон республикаси қишлоқ ва сув хўжалиги вазирлиги тошкент давлат аграр университети шералиев Абдусаид Шералиевич

IХ-БОБ

БАКТЕРИАЛ КАСАЛЛИКЛАРГА ҚАРШИ УЙҒУНЛАШГАН ҲИМОЯ ҚИЛИШНИНГ АҲАМИЯТИ

Ўсимликларни ҳимоя қилишда касаллик қўзғатувчи микроорганизмларга қарши профлактик (олдини олиш) ва кўпайиб кетган шароитда уларни қириб ташлаш тадбирлари ўтказилади.

Қишлоқ хўжалик экинларининг касалликларига қарши кураш чораларини тўғри белгилашда касалликни келтириб чиқарувчи микроорганизмлар турларини тўғри аниқлаш, уларнинг биологик хусусиятларини билиш ва самарали таъсир қиладиган воситаларни тўғри қўллаш муҳимдир. Экинларнинг касалликларига қарши кураш чоралари умумагрономик ва ихтисослашган турларга бўлинади.
Экинларнинг касалликларга чидамлилигини ва ҳосилдорлигини оширишда турли ўғитларни меъёрида қўллаш, навларни тўғри танлаш билан бирга ўсимликлар қолдиғидаги, тупроқдаги, уруғдаги ва ҳаводаги инфекция миқдорини камайтиришга қаратилган тадбирлар муҳим аҳамиятга эга. Экинларнинг касалликларга ва ҳашаротларига қарши кураш чораларини қўллаш усулига қараб профилактика ва даволаш мақсадида ўтказиладиган селекцион-уруғчилик, агротехник, биологик, кимёвий, физикавий-механик турларга бўлинади.
Зарарли организмларнинг қишлоқ хўжалигига келтирадиган иқтисодий зарарини камайтиришда қуйидаги ташкилий хўжалик тадбирларини ўтказишни тақозо қилади:

• 
  Ҳар бир фермер хўжалигидаги экинзорларда касаллик, зараркунанда ва бегона ўтлар тарқалиши мумкин бўлган майдонларни туман миқёсида аниқлаш;
  
• 
  Ўсимликларни ҳимоя қилиш гуруҳининг зарарли организмларга қарши ўтказиладиган тадбирлар усули, воситалари, муддати, такрорийлиги, ҳимоя воситаларининг хажми ва миқдорини аниқлаш;
  
• 
  Туман миқёсида фойдаланиш учун зарур транспорт ва аппаратуралар ҳажмини ва эҳтиёт қисимларининг миқдорини аниқлаш;
  
• 
  Иш жараёнида зарур бўлган шахсий ҳимоя воситалари, хўжаликдаги қолдиқ воситалар миқдори аниқланиб, зарурларига талабномалар олиш;
  
• 
  Омборларни тайёрлаш, дала кезатувчилари ва мутахассислар малакасини ошириш, аттестация қилиш, назоратчилар гуруҳини тузиш;
  
• 
  Майдонларни яхлитлаш, чидамли навлани экиш ва районлаштириш, манбалардаги бегона ўтларни йўқотиш