Ўзбекистон республикаси фанлар академияси

Натижаларнинг эълон қилинганлиги. Диссертация ишининг умумий мазмуни ва натижалари 30 та илмий мақолаларда нашр қилинган, шу жумладан 10 та –ҳалқаро ва республика илмий журналларида, 20 таси - ҳалқаро ва республика конференциялари материаллари тўпламида чоп этилган.
Диссертациянинг тузилиши ва ҳажми. Диссертация кириш қисм, тўртта боб ва хулосадан иборат. Иш 128 саҳифада баён қилинган бўлиб, 24 та чизма, 3 жадвал ва 111 манбани ўз ичига олган фойдаланилган адабиётлар рўйхати илова қилинган.
2. Диссертациянинг асосий мазмуни.
Диссертациянинг кириш қисмида мавзуининг долзарблиги асосланган. Ишнинг мақсади ва вазифалари, илмий янгилиги химояга чиқариладиган асосий қоидалар баён этилган, олинган тадқиқот натижаларининг илмий ва амалий ахамияти очиб берилган, ишда олинган натижаларнинг амалда татбиқ қилиниши, нашр этилган ишлар, синовдан ўтганлиги тўғрисидаги маълумотлар келтирилган.
Диссертациянинг биринчи бобида анъанавий энергия манбаларининг иссиқлик чиқиндиларидан фойдаланиб ишлайдиган иссиқлик аккумуляторли ва тупроқ ости суғориш тизимли қуёш иссиқхоналарининг асосий конструктив ечимлари ва техник-иқтисодий кўрсаткичларининг замонавий ҳолати таҳлил қилинган ва умумлаштирилган.
Ишлаб чиқилган тизимларнинг ва уларни иссиқлик-техникавий хисоблаш методларининг ютуқлари ва камчиликлари очиб берилган. Иссиқхоналарда суғориш технологиялари ва суғориш режимларини ҳисоблаш, тупроқни иситиш, ҳавони углерод диоксиди билан бойитиш ва иситиш учун чиқинди иссиқликдан фойдаланиш принциплари кўриб чиқилган.
Ўсимликларни СО₂ билан озиқлантириш ва иссиқхонани иситишда газсимон ёқилғининг ёниш маҳсулотларидан фойдаланиш масаласи ўрганилган. Кўрилаётган иситиш ва ўсимликларни озиқлантириш усули оддий, кўп харажат талаб қилмайди ва бошқариш жараёнини осон автоматлаштириш мумкин.
Аммо ушбу иситиш усули кам ўрганилган ва республикамиз ҳамда чет элда иссиқхона хўжалигида тўлиқ ўзлаштирилмаган.
Ўзбекистон ва чет эл иссиқхона хўжалигида қуёш энергияси ва иккиламчи энергия ресурсларидан комбинациялашган ҳолда фойдаланишга оид тадқиқотларнинг даражаси ва уни кенгайтиришни ҳисобга олиб, бажарилган таҳлиллар асосида диссертация ишининг мақсади ва вазифалари шакллантирилди