Ўзбекистон республикаси адлия вазирлиги

12-BOB. BUYRUQ TARTIBIDA ISH YURITISH


12.1. Sud buyrug‘i tushunchasi va ahamiyati

Sudyalarning ish hajmini kamaytirish, shu orqali odil sudlovni ta’minlashning samaradorligi va sifatini oshirishning muhim usullaridan biri – sudda ishlarni soddalashtirilgan tartibda hal etish usullarini rivojlantirishdir. Zero, O‘zbekiston Respublikasi Prezidentining

2017- yilning 8-fevralida matbuotda e’lon qilingan “O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida”gi Farmonida qonun ustuvorligini ta’minlash va sud-huquq tizimini yanada isloh qilishning ustuvor yo‘nalishlari odil sudlovni amalga oshirish samaradorligi va sifatini oshirish, ma’muriy, jinoyat, fuqarolik va xo‘jalik sud ish yurituvining protsessual asoslarini takomillashtirish belgilanganligi bejiz emas.
Fuqarolarning sud orqali himoyalanishga bo‘lgan huquqlarini amalga oshirishlari uchun qo‘shimcha qulayliklar yaratish hamda da’vo arizalari va shikoyatlarni qabul qilish hamda ularni ko‘rib chiqish borasidagi dastlabki jarayonlarni yanada soddalashtirish maqsadida fuqarolik ishlarini sudda ko‘rish va hal qilishning bir muncha soddalashtirilgan tartibi “Buyruq tartibida ish yuritish” joriy etilgan.¹¹
Darhaqiqat, fuqarolik ishlarini ko‘rish va hal qilish tartibini belgilovchi fuqarolik protsessual qonunchilikni yanada takomillashtirish maqsadida fuqarolik ishlari bo‘yicha sudlarga kelib tushayotgan da’vo arizalari, ariza va shikoyatlarni qabul qilish hamda ularni ko‘rib chiqish borasidagi dastlabki jarayonlarni imkoni boricha soddalashtirish masalalariga alohida e’tibor qaratilishi bejiz emas. Zero, fuqarolik ishlarini ko‘rib chiqishning dastlabki jarayonlarini soddalashtirish sudyalar yurituvidagi ish yuklamalarining kamayishiga olib keladi.

Sud buyrug‘i nizosiz talablar bo‘yicha sud o‘tkazmasdan berilgan sud hujjatidir.