14.5. Mehnatga oid nizolar bo‘yicha sudning hal qiluv qarori va ijrosi
Mehnatga doir huquqiy munosabatlardan kelib chiqadigan ishlar bo‘yicha sudlar tomonidan qabul qilinadigan hal qiluv qarorlari to‘liq ravishda FPKning 249–253-moddalari talablariga javob berishi lozim.
Mehnatga oid ishlar bo‘yicha chiqariladigan sud hal qiluv qarorlarining kirish qismida hal qiluv qarori chiqarilgan vaqt va joy, hal qiluv qarori chiqargan sudning nomi, sudyaning familiyasi (sud tarkibi), sud majlisining kotibi, prokuror, agar ish ochiq yoki yopiq sud majlisida ko‘riladigan bo‘lsa, bu haqdagi ma’lumot, ko‘rilayotgan ishning nomi, qanday korxona, tashkilot va muassasa tomonidan da’vo berilganligi (to‘liq nomi bilan), agar da’vo prokuror yoki bo‘ysunuv tartibidan yuqori turuvchi ish beruvchi tomonidan berilgan bo‘lsa, qaysi yuridik shaxs manfaati ko‘zlanganligi, da’vo arizada ko‘rsatilgan yoki sud tomonidan jalb etilgan barcha javobgarlar (familiya, ismi va sharifi ko‘rsatilgan holda), da’vosining summasi ko‘rsatilishi kerak.
Mehnat ishlari bo‘yicha sud hal qiluv qarorining bayon qilish qismida da’vogarning talabi, javobgarning e’tirozlari va ishda ishtirok etuvchi boshqa shaxslarning tushuntirishlarini aks ettirishi kerak.
Mehnat ishlari bo‘yicha sud hal qiluv qarorining asoslantiruvchi qismida ishning sud tomonidan aniqlangan holatlari, sudning ish holatlari to‘g‘risidagi xulosalari asoslangan dalillar, sudning u yoki bu dalillarni rad qilganligi haqidagi xulosalari, sud amal qilgan moddiy va protsessual huquq normalari ko‘rsatilishi kerak. Arz qilingan talab javobgar tomonidan tan olingan taqdirda, asoslantiruvchi qismda faqat arz qilingan talabning tan olinganligi va uning sud tomonidan qabul qilinganligi ko‘rsatilishi mumkin.
Ushbu turkumdagi ishlar yuzasidan chiqarilgan sud hal qiluv qarorining xulosa qismida sudning arz qilingan talablarni qanoatlantirishi yoxud butunlay yoki qisman rad etish to‘g‘risidagi xulosasi, da’vogarning foydasiga javobgardan (yoki har bir javobgar) undiriladigan zararning aniq summasi, sud xarajatlarining miqdori, uning taqsimlanishi, hal qiluv qarori ustidan shikoyat berish muddati va tartibi ko‘rsatilishi lozim.
O‘zbekiston Respulikasi FPKning 266-moddasiga ko‘ra, xodimga uch oylik ish haqidan ortiq bo‘lmagan ish haqini undirib berish to‘g‘risidagi; mayib bo‘lganlik yoki sog`liqqa boshqacha tarzda shikast yetishi, shuningdek boquvchisining o`limi natijasida ko‘rilgan zararni qoplash uchun to‘lovlar undirish to‘g‘risidagi; mehnat shartnomasi g`ayriqonuniy ravishda bekor qilingan xodimni yoki g‘ayriqonuniy ravishda boshqa ishga o`tkazilgan xodimni avvalgi ishiga tiklash to‘g‘risidagi, shuningdek mehnat shartnomasini bekor qilish asoslarining ta`rifini o‘zgartirish to‘g‘risidagi ishlar bo‘yicha chiqarilgan hal qiluv qarori darhol ijro etiladi.
Do'stlaringiz bilan baham: |