Zbekiston respublikasi adliya vazirligi toshkent davlat yuridik universiteti

Huquq tizimining mavjudligi. Huquqsiz davlat mavjud bo‘la olmaydi. Huquq davlat hokimiyatini yuridik jihatdan rasmiylashtiradi, unga qonuniy tus beradi. Davlat o‘z funksiyalarini huquqiy shakllarda, ya'ni qonunga asoslanib amalga oshiradi. Davlat ijtimoiy munosabatlarni huquqiy tartibga solish orqali jamiyatda qonuniylik, huquqiy tartibot va ijtimoiy adolat o‘rnatadi. Huquq davlat va davlat hokimiyati faoliyatini aniq huquqiy tartibga bo‘ysundiradi.
Soliq tizimiga egaligi. Faqat davlatgina aholidan rasmiy tartibda soliq yig‘ish huquqiga ega. Davlat hududida yashayotgan barcha shaxslar davlat xazinasiga, ya'ni byudjetiga majburiy tartibda qonunchilikda belgilangan soliqlarni to‘lab borishlari shart. Soliqlardan tashqari davlat foydasiga boshqa yig‘imlar va davlat bojlari ham undiriladi. Ular yordamida davlatning faoliyat yuritishi uchun zarur bo‘lgan moddiy-moliyaviy baza shakllantiriladi. Ushbu moddiy baza asosida davlat organlari faoliyati moliyalashtiriladi hamda iqtisodiyot, tabiatni muhofaza qilish, ta'lim, sog‘liqni saqlash va boshqa ijtimoiy sohalar yuzasidan davlat dasturlarining amalga oshirilishi ta'minlanadi.