Ózbekistan respublikasí joqarí HÁm orta arnawlí bilimlendiriw ministrligi

Iosif II reformaları. Mariya Tereza reformaların onıń ulı Iosif II (1780-1790) nátiyjeli dawam ettirdi. 1781- jılı 1-noyabrde Iosif II Chexiya, Moraviya, Sileziya hám Galiciyada krepostnoy huqıqtı biykar etiw haqqında óziniń birinshi pármanın ( Puqaralar haqqında patent) qabıl etti. Keyingi jılları bul nızam Shtiriya, Karintiya, Krayna hám Vengriyaǵa da járiyalandı. Bul nızam awılda kapitalistlik qatnasıqlardıń jánede rawajlanıwı ushın túrtki boldı.

Hákimshilik-aymaqlıq tarawda ótkizilgen reformalar úlkelerdiń avtonomiyasına shek qoyıwǵa qaratılǵan edi. Sol maqsette pútkil mámleket 13 walayatqa bólinip, olardı oraydan tayınlanatuǵın ámeldarlar basqaratuǵın boldı. Oraylastırıw siyasatı Vengriya, Transil`vaniya, Galiciya hám basqalardı koloniyalastırıw menen qosıp alıp barıldı. Mıńlap qubla vengriyalı hám avstraliyalı nemisler bul aymaqlarǵa kóshirildi. 1784-jılı bárshe hákimshilik organlarda nemis tilin qollanıwdıń májbúriyligi tuwrısında párman shıǵarıldı.

Imperatordıń din tuwrısındaǵı dekreti bir qansha progressiv xarakterge iye edi. Bul dekret protestant hám grek-provaslav shirkewine qarata qollanılıp kelingen bárshe kemsitiwlerdi biykar etti. Sonday-aq,evreylerdi huqıq tárepinen teńlestiriw, belgili kásiplerge bolǵan sheklewdi biykar etiw hám gettolardı qadaǵalaw haqqında nızam da úlken hádiyse boldı.

Mádeniyat hám aǵartıwshılıqtı rawajlandırıw ushın Iosif tárepinen ámelge asırılǵan isler, tiykarınan knyazlar hám katolik shirkewinen cenzura huqıqınıń alınıwı, qadaǵalanǵan ádebiyatlar diziminiń qısqartılıwı, kitapxana hám oqıw zalların shólkemlestiriw, 6-12 jaslı balalardıń májbúriy tálimin járiyalawǵa háreket úlken ahmietke iye boldı. Biraq Iosif reformalarınıń kópshiligi, keyinshelik, francuz revolyuciyasınıń qorqıwı astında biykar etildi.