Ózbekistan respublikasí joqarí HÁm orta arnawlí bilimlendiriw ministrligi

Súwretlew óneri. XVIII ásirdıń birinshi yarımında Evropa súwretlew ónerinde elede saray xalqınıń náziklik tásirinde edi. Bul dáwir «koroldıń birinshi súwretshisi», ápsanaǵa aylanǵan hám pastoral` saxnalardıń ájayıp ustası Francua Bushe dáwiri (1703-1770) edi. Súwretshi tárepinen aqkókirek shopan erkek hám hayallar kórinisinde súwretlengen xanımlar hám mırzalar biypárwa sáwbetlesedi, quwanadı hám oyınǵa túsedi. Súwretshi súwretlegen tábiyat hám ájayıp, kishkene salmanıń boyı, aǵash kópir, ótkir ushli imarat hám bir qansha adamlar («Bove átirapı peyzaji») – hámme nárse názik hám ózine say, haqıqıy ómirden sheksiz uzaqta bolǵan Bushe súwretleri aristokratik saraylarǵa ájayıp bezek bola aladı.

Antuan Vattonıń (1684-1781) kórkem-óneri anaǵurlım tereńrek. Onıń polotnoları eń názik sezimlerdi, kaharmanlardıń kóz ilmes keypiyatların sáwlelendiredi. Vatto dún`yası – shayırsımaq oylar, maskarad hám bázimler dún`yası. Jumsaq, áste taralǵan nur nárselerdiń sayaların jasırın kórsetip atırǵanday boladı. Óte názik kolorit eń sapalı qosıqtay shıǵadı.

Vattonıń ataqlıǵı júdá úlken edi. Rossiya korolevası Ekaterina II ushın ataqlı artistlerdiń bir qansha polotnoları satıp alındı. Olardıń arasında «Qıyın mirát» da bar edi. Onsha kóp sanlı bolmaǵan jámáát baǵda jaylasqan. Xanımlardan biri menen onıń jigiti ortasında ǵana kelispewshilik shıqqan hám bul gózzal tezirek ketip qalmaqshı. Jasırıp bolmaytuǵın qızıǵıw menen jaqın arada jaylasıp alǵan óspirim olardıń sózlerine qulaq tutıp turıptı. Qıyın bolmaǵan bul saxnanıń dawamı tamashagóylerge ózine juwmaq jasawǵa qoyılıp berilgen.

Vattonnıń basqa bir polotnosı – «Biypárwa» - súwrette, jas jigit oyın háreketlerin áste-aqırın hám sulıw etip orınlamaqta. Bul tawsılmas ómir bayramı qatnasıwshınıń júzinde biypárwalıq hám zerigiw sáwlelengen.