Замонавий психология муаммолари

НОТЎҒРИ МУЛОҚОТ УСУЛЛАРИ
Ҳар биримиз фақат ўзимизга хос бўлган мулоқот усулини шакллантирамиз, бу нарса бизни ортиқча ҳаяжондан сақлайди. Қуйида, кам самара бериши мумкин бўлган айрим мулоқот усуллари баён қилинган.
А) низодан ўзини четга тортиш. Кимки бу усулга амал қилса ўз манфаатларини ҳимоя қилишдан қочади. Низо пайдо бўлганда бундай одамлар ёки жўнаб қолишади, ёки ухлагандек, бирон нарса билан банддек найранг қилишади ёки муаммони муҳокама қилишдан қочиш учун ҳар турли баҳоналарни ишлатишади. Бундай ҳулқ суҳбатдошни қийин аҳволга солиб қўяди, чунки у олдиндан жавоб бўлмаслигини билганлиги учун ўз норозилигини намоён қила олмайди. Доим ўзини четга оладиган одам билан тортишиш, бокс қўлқопи киймаган одам билан бокс тушишга уриниш каби бефойда.
Б) ёлғондакам рози бўлиш. Бу усулга амал қиладиганлар нафақат тортишувдан ўзларини четга оладилар, балки яна ўзларини ҳеч нарса бўлмагандек тутадилар. Бундай ҳулқ атрофдагиларнинг ғашини келтиради, ахир ҳақиқатда муаммо мавжудлигини улар билишади. Бундай одам билан ўзингни худди атайин жанжал чиқараётган айбдордек ҳис қила бошлайсан, шунинг учун ҳам ҳамма билан келишаверадиган одамлар ҳаммага ёмон кўринадилар.
В) яширин айблаш. Ўзларига ёқмаган нарсани очиқ айтиш ўрнига айрим одамлар ўзларининг оғир аҳволга тушганликлари учун суҳбатдоши ўзини айбдор деб ҳис қилсин деган мақсадда, суҳбатдошларини ўйнатишади. Аксарият ҳолларда бундай одамлар: “Ҳаммаси яхши, мен ҳақимда қайғурма”- дейишиб, оғир уф тортиб қўйишади.
Г) мавзуни алмаштириш. Низодан қочишнинг яна бир усули мунозарали масала ҳақида сўз очилиши биланоқ, бундай одамлар гапни бошқа ёққа буришади ва шу билан ҳам ўзларини, ҳам суҳбатдошларини муаммони муҳокама қилиш ва ҳал қилиш имкониятидан маҳрум қилишади.
Д) танқид. Очиқ гаплашиш ва конкрет сабаб бўйича ўз норозилигини баён қилиш ўрнига танқидчилар суҳбатдошининг шахсий камчиликларига ҳужум қилишади. Улар ҳеч қачон юракларидаги гапни очиқ айтишмайди ва турли йўллар билан муносабатларидаги нохуш ҳолатлардан қочишади.