Yasashga doir masalalarni yechishdagi Algebraik metod

7. Tekshirish natijasiga qarab, izlanuvchi kesma yuqorida topilgan ifodasi bo’yicha ma’lum qurollar vositasi bilan yasaladi.

8. Agar masalada kesma emas, balki boshqa biror figura so’ralgan bo‘lsa, yuqoridagi ishlar natijasida topilgan kesma yordamida so’ralgan figura yasaladi.

2 – masala

Berilgan ikki nuqtadan o’tib, berilgan to’g’ri chiziqqa urinuvchi aylana chizing.

Analiz. Izlanuvchi aylana 3-chizmadagi A va B nuqtalardan o’tib, PQ to’g’ri chiziqqa urinuvchi O markazli aylana bo’lsin. Bu aylanani yasash uchun uning berilgan A va B nuqtalardan boshqa yana birorta nuqtasini, masalan, to’g’ri chiziqqa urinish nuqtasi E ni topsak kifoya. E nuqtani belgilash uchun uning biror ma’lum nuqtagacha bo’lgan masofasini aniqlash kerak. A, B nuqtalar va PQ to’g’ri chiziq berilgan, shuning uchun AB va PQ to’g’ri chiziqlarning kesishgan C nuqtasi ma’lum deb hisoblanadi. Shuningdek, CA=a va CB=b kesmalarni ham ma’lum deya olamiz. Demak, E nuqtani topish uchun CA va CB kesmalar yordami bilan CE kesma topilsa kifoya.