Ярим ўтказгичли диодлар

ЯРИМ ЎТКАЗГИЧЛИ ДИОДЛАР


2.1. Ярим ўтказгичли диодлар, уларнинг вазифалари ва синфланиши
Замонавий техника соҳаларида қўлланилувчи электрон қурилмалар асосан ярим ўтказгичли диодлар ва бир нечта ўтишли асбоблардан ташкил топган. Бунга ярим ўтказгичли асбобларнинг ўлчамлари ва вазни кичиклиги, фойдали иш коэффициентининг юқорилиги, узоқ муддат хизмат қилиши ва юқори чидамлиги каби афзалликларга эгалиги асос бўлган.
Ярим ўтказгичли диод – бу битта электр ўтиш (р-n ўтиш) - ли ва ярим ўтказгичга жипслаштирилган металлдан чиқарилган икки чиқишга эга асбобдир.
Электр ўтиш асосан икки турдаги электр ўтказувчанликка эга аралашма (р- ёки n- типдаги) орасида ҳосил бўлади. Бу соҳалардан бири (кичик қаршиликли) эмиттер, бошқаси (юқори қаршиликли) – база дейилади. Диоднинг тузилиши ва унинг схемаларда белгиланиши 2.1 - расмда кўрсатилган.

2.1 - расм
Базан электр ўтказувчанлик р- ёки n- типдаги ярим ўтказгич билан металл орасида ҳосил қилинади ва бундай ўтиш металл - ярим ўтказгич туташуви дейилади.
Диодлар турли белгиларга кўра синфланади: ярим ўтказгич материалига кўра – кремнийли, германийли, галлий арсенидли, селенли; ишлаш асосини белгилаб берувчи жараёнлар табиатига кўра – тунелли, фотодиодлар, ёруғлик диодлари ва ҳ.к.; қўлланилиш мақсадларига кўра – тўғриловчи, импулсли, стабилитронлар, варикаплар ва ҳ.к.; электр ўтишни тайёрлаш технологиясига кўра – эритиш, диффузия ва ҳ.к.; электр ўтиш типига кўра – нуқтали ва ясси. Улар ичида энг асосийси электр ўтиш турига ва қўлланилиш мақсадларига кўра синфланишидир.
Ҳозирги вақтда кенг қўлланилаётган диодлар селен, германий, кремнийдан ясалган бўлиб, галлий арсенидидан ва фосфидидан диодлар таёрлаш келажаги порлоқ эканлиги тасдиқланган.
Селенли диод думалоқ дисклар (шайбалар) ёки тўғри бурчакли пластинкалар кўринишида ясалган тўғирлагич пластинкалардан йиғилади. Бу пластинкаларни кетма-кет ёки параллел улаб, талаб қилинган қувватли тўғирлагич эле-менти ҳосил қилинади (2.2 - расм).

2.2 – расм 2.3 - расм