Xudoyberdiyev eldor uktamjonovich

Himoyaga olib chiqilayotgan asosiy holatlar. Erkin A'zam nasri zamonaviy o'zbek adabiyotining qiyofasini ochib berishda o'ziga xos xarakterga ega. Adib birinchilardan bo'lib yangi davr adabiyotida badiiy asar bilan kino asarni uyg'unlashtirgan holda yangi janrga asos soldi, desak mubolag'a qilmagan bo'lamiz. Bu hol adabiyotimiz va adabiyotshunosligimiz uchun katta voqea bo'ldi.
Yozuvchi dastlabki hikoya va qissalaridanoq yangi tasvir usullaridan foydalanib sujet va kompozitsiya yaratishda o'ziga xos o'zgacha uslub yarata oldi. Keyinchalik bu xususiyatlar kinoqissalarida yanada mukammallik kasb etdi.
Erkin A'zam o'z asarlari uchun tanlagan mavzu bugunning odamlarlarini qiynayotgan muammolar haqida bo'lsa, sujetni harakatlantiruvchi konflikt qahramaonlar ruhiyatida yuz beradi. Adib asarlari uchun umumiy g'oya kim bo'lishimizdan qat'iy nazar “Inson” degan oliy maqomga mos tarzda hayot kechirish kerakligidir.
Erkin A'zam nasriga xos yana bir xarakterli xususiyat shundaki, U qahramonlarini o'zi harakatlantirmaydi, balki ularning turli xil muhitlardagi harakatini kuzatib boradi. Shu bilan birga mikromakonga katta bir davrni sig'dira oladi. Yozuvchi asarlari tili piching va kesatiqlarga boyligi bilan ham ahamiyatlidir.
Tadqiqotning amaliy ahamiyati. Erkin A'zam uslubi adabiyotimiz uchun ma'lum ma'noda yangilik hisoblanadi. Bugungi kunda bu ijodkor ijodiga qiziquvchilar soni ko'paymoqda. Bizning tadqiqotimiz Erkin A'zam ijodini o'rganuvchilar uchun kichik bir dastur vazifasini o'taydi, deb o'ylaymiz. Adib asarlaridagi mazmun va g'oyani anglab olishda ma'lum bir qo'llanma zurur. Chunki Erkin A'zam asarlarini o'qish jarayonida sujet va kompozitsoin qurilishini tushunishda kitobxonlar va yosh adabiyotshunoslarda bir qancha savollar tug'ilishi mumkin. Tadqiqotimizda adib asarlarining sujeti va kompozitsiyasi qay tarzda vujuda kelayotganligini tahlil qilib berdik. Endilikda kitobxon yoki yosh adabiyotshunoslar, talabalar sujet va kompozitsiya yaratishning yangi bir usullari haqida xabar topadi. Bu adabiyotshunosligimizda mavjud bo'lgan bo'shliqlardan birini qisman bo'lsa-da to'ldiradi, deb niyat qilamiz.
Bundan tashqari Erkin A'zam ijodi adabiyotimizda yangi bir ummon sifatida paydo bo'ldi. Bu ummonga sho'ng'ishda ushbu tadqiqot yosh adabiyotshunoslarga asqotadigan kichik bir metodologik va ilmiy manba vazifasini bajarishiga umid qilamiz.