Xalqaro jurnalistika fakulteti xalqaro jurnalistika nazariyasi va amaliyoti

Ilmiy rahbar: B.S.Alimov, Phd


Xalqaro jurnalistika fakultetining 4-bosqich talabasi
Xolida Abdusattorovaning
“Zamonaviy OAVni rivojlantirishda ijtimoiy tarmoqlardan foydalanish imkoniyatlari” mavzusidagi bitiruv malakaviy ishiga
TAQRIZ
Ma’lumki, bugungi kunda deyarli barcha OAV ijtimoiy tarmoqlarda o‘zining rasmiy sahifasiga ega. Chunki, ijtimoiy tarmoqlar axborot almashish va biror mavzu yuzasidan muhokama uchun jamiyatning erkin minbariga aylanib ulgurdi. Shu jumladan, bugungi kunda ijtimoiy tarmoqlarning imkoniyatlarini chuqur tadqiq etish OAV faoliyatini tashkil qilishda muhim ahamiyatga ega.
Xolida Abdusattorovaning “Zamonaviy OAVni rivojlantirishda ijtimoiy tarmoqlardan foydalanish imkoniyatlari” mavzusidagi yozgan bitiruv malakaviy ishi aynan shu nuqtayi nazardan qaraganda alohida ahamiyat kasb etadi.
Mazkur bitiruv malakaviy ishining mavzusi bugungi davrda dolzarb bo‘lib, unda mamlakatimizda axborot tizimidan qay tartibda foydalanish, auditoriya ehtiyojlarini o‘rganish, shuningdek sifatli va tezkor axborot uzatishda ijtimoiy tarmoqlarning roli xususida so‘z boradi. Bitiruv malakaviy ishida ijtimoiy tarmoqlarning jurnalistik faoliyatga ta’siri, ommaviy axborot vositalari rivojlanishida ijtimoiy tarmoqlarning o‘rni va hamkorligini o‘rganish, shuningdek, jamiyatda ommaviy kommunikatsiya vositalari, internet, xususan, ijtimoiy tarmoqlarning qanchalik ahamiyat kasb etishi kabi masalalar tahlil etilib, nazariy qarashlar solishtiriladi.
Bitiruv malakaviy ishi kirish, asosiy mazmunni ifoda etuvchi 2 ta bob, beshta paragraf, xulosa, foydalanilgan adabiyotlar ro‘yxati hamda ilovadan iborat.
Xolida Abdusattorovaning “Zamonaviy OAVni rivojlantirishda ijtimoiy tarmoqlardan foydalanish imkoniyatlari” mavzusidagi bitiruv malakaviy ishining birinchi bobida ijtimoiy tarmoqlarning shakllanish tarixi va unda etika masalalarining yoritilishiga bag‘ishlanadi. Veb-sayt, ijtimoiy tarmoqlar va bloglarni yuritishda etika tamoyillariga rioya etish, shaxsning intellektual darajasi, bilimi bilan birgalikda uning imijini ham belgilab berishi xususida tahlillar olib boriladi.
Ishining ikkinchi bobida, ijtimoiy tarmoqlarda ommaviy axborot vositalarining keng ommalashuvi, imkoniyatlar va muammolar yoritilgan. Mazkur bo‘limda ommaviy axborot vositalariga tegishli kontentni keng ommalashishi uchun asosiy vosita boʻlib xizmat qiluvchi ijtimoiy tarmoqlar imkoniyatlari koʻrib, tahlil qilingan. Ommaviy axborot vositalari ijtimoiy tarmoqlar bilan hamkorlikda ishlash orqali qator afzalliklarga ega boʻladi. Bitiruv malakaviy ishida telekanallarning ijtimoiy tarmoqlar imkoniyatidan foydalanish usullari yoritilgan. Reytingni oshirishda, ko‘rsatuvlarni ommalashtirishda xususiy telekanallar ham ijtimoiy tarmoqlar imkoniyatlaridan keng foydalanmoqda.
O‘zbekistonda ijtimoiy tarmoqlar jurnalistika nuqtayi nazaridan deyarli hali to‘la tadqiq etilmagan, yangi mavzulardandir. Xolida Abdusattorova tadqiqot muammosini chuqur anglagan holda ijtimoiy tarmoqlarda onlayn jurnalistika xususiyatlarining namoyon bo‘lishi, ijtimoiy tarmoqlar bilan jurnalistikaning o‘zaro aloqadorligi, milliy ommaviy axborot vositalarining rivojida ijtimoiy tarmoqlarning o‘rni va ahamiyati kabi masalalalarga ham alohida to‘xtaladi. Malakaviy bitiruv ishini tayyorlash davomida yosh tadqiqotchi ko‘plab ilmiy-nazariy manbalarga murojaat etgan. Bular muallifda tadqiqotchilik ko‘nikmalari yaxshi rivojlanganidan dalolat beradi.
Ushbu fikrlarga tayangan holda, Xolida Abdusattorovaning “Zamonaviy OAVni rivojlantirishda ijtimoiy tarmoqlardan foydalanish imkoniyatlari” mavzuyidagi bitiruv malakaviy ishi DAK talablariga to‘la javob beradi va uni yuqori baholash mumkin, deb hisoblayman.