Ўзбекистон республикаси ички ишлар вазирлиги академияси дастлабки тергов ва криминалистика кафедраси тергов фаолияти мутаҳасислиги

6) велосипедчини уриш. Ҳаракатланаётган транспорт воситасининг велосипедчига урилиши ёки велосипедчининг ҳаракатланаётган транспорт воситасига урилиши ҳодисасига велосипедчини уриш дейилади;
7) уловли транспортни уриш. Ҳаракатланаётган транспорт воситасининг миниладиган, аравага уланадиган, юк ташийдиган ҳайвонларга ёки уларнинг аравасига урилиши ҳодисасига уловли транспортни уриш дейилади;
8) ҳайвонларни уриш. Ҳаракатланаётган транспорт воситасининг уй ва ёввойи ҳайвонларга, паррандаларга урилиши ёки уларнинг ўзларининг ҳаракатланаётган транспорт воситасига урилиши оқибатида одамларга зарар етказилса, ҳайвонларни уриш ҳодисаси дейилади;
9) бошқа ҳодисалар:
- трамвайларнинг йўл релсидан чиқиб кетиши (натижасида тўқнашув ёки унинг ағнаб кетиши);
- ҳаракатланаётган транспорт воситасида ёки унинг тиркамасида олиб кетилаётган юкнинг тушиб кетиши натижасида одамларга зарар етказиши, жароҳатланиши ёки ҳаётдан кўз юмиши;
- ҳаракатланаётган транспорт воситасидан, унинг бирданига тўхтаб қолиши ва бошқа шунга ўхшаш сабабларга кўра пассажирларнинг чиқиб кетиши.
Булардан ташқари, йўл-транспорт ҳодисалари оқибатларининг оғирлиги, характери, механизмлари ва бошқаларга кўра турларга бўлинади.²¹
Автомашинани кўздан кечириш – терговчи ёки йўл ҳаракати хавфсизлиги хизматининг суриштирувчиси томонидан ўтказилади. Кўпинча, йўловчига автомашинанинг олд қисми билан зарба етказилади, шунинг учун, одатда, автомашинадаги жароҳатлар олд бамперда, капотда, давлат белгисида, олд қанотларда, чироқ ва кичик чироқлар ҳамда бурилиш чироқларида, радиатор тўсиқларида – кузовнинг деформатсияси, чанг ёки кирланиш қатлами, қирилиш ва бўёқларнинг ёрилиши кўринишларида вужудга келади. Бирламчи зарба таъсирида ушбу деталларнинг синиши ва бўлакларга ажралиши ҳам кузатилади. Капот устидаги деформатсияланиш излари кўпинча иккиламчи зарба таъсиридан вужудга келади. Автомашинани кўздан кечириш давомида аниқланган барча изларнинг шакллари, ўлчамлари, ўзаро жойлашуви, йўл қатламидан уларнинг баландлиги кўрсатилиб, баённомага киритилади. Бундан ташқари, автомашинанинг қисмларида қон, соч, тери қатламчалари, мия моддаси, кийим толалари ҳам учраши мумкин. Ушбу кўринишдаги излар ҳам баённомага киритилиши, деталли равишда фотосуратга олиниши ва ашёвий далил сифатида олиниши керак.
Автомашинанинг салони кўздан кечирилаётганда, дастлаб унинг бошқарув қисмлари ва назорат асбобларининг ҳолатлари қайд этилиши керак.