Toshkent farmasevtika instituti toksikologik kimyo kafedrasi

Chinligini aniqlash. Geroin kuchli narkotik modda. Organizmda, murda organlarida va ishqoriy eritmani xloroform bilan ekstraksiyalashda gidrolizga uchragani uchun uning barcha reaksiyalari morfinga nisbatan olib boriladigan reaksiyalar bilan bir xil bo‘ladi.
Agarda ashyoviy dalil sifatida tahlil uchun kukun modda yoki geroin eritmalari yuborilgan bo‘lsa, u xolda quyidagi reaksiyalar yordamida aniqlash mumkin:
1. Marki reaktivi ta’sirida geroin shu ondayoq binafsha rang hosil qiladi.
2. Geroin Frede reaktivi bilan ham xuddi morfin singari binafsha rang beradi (shu bilan u kodeindan farq qiladi).
3. Temir -.III xloridi geroin bilan hech qanday rang hosil qilmaydi.
4. Geksaxloroplatinat kislota H₂PtCl₆ geroin bilan sariq ignalardan iborat mikrokristallarni hosil qiladi. Reaksiyaning sezgirligi 0,05 –0.07 mkg geroinga teng.
5. Geroin gidrolizlanganda hosil bo‘lgan sirka kislotani aniqlash uchun etil spirti va konsentrlangan sulfat kislota bilan qizdirish xarakterli etil atsetat efiri hidini hosil qiladi.
6. UB-spektri bo‘yicha aniqlash: 0,1 n xlorid kislotadagi eritmasi 279 nm to‘lqin uzunligida, 0,1 n ishqordagi eritmasi 299 nm to‘lqin uzunligida maksimal nur yutadi.
7. IQ- spektrlari. Geroin 1245, 1764, 1178, 1215, 911, 1736 ga teng spektrlar hosil qiladi.
Hozirgi davrda geroinni gaz-suyuqlik xromatografik, xromato-mass spektrometrik va immunobiologik aniqlash usullari yo‘lga qo‘yilgan.